सुनसरीमा ५.०४ ग्राम ब्राउन सुगर सहित मोटरसाइकल चालक पक्राउ
सुनसरी । सुनसरीको इनरुवा नगरपालिका–३ देवकोटा स्कुल नजिकबाट प्रहरीले लागूऔषध ब्राउन सुगरसहित एक जनालाई पक्राउ गरेको छ।
जिल्ला प्रहरी कार्यालय सुनसरीबाट खटिएको प्रहरी टोलीले बुधबार दिउँसो करिब २ बजे पश्चिमबाट पूर्वतर्फ आउँदै गरेको को २५ प ९४७६ नम्बरको मोटरसाइकललाई शंकास्पद रूपमा रोकी चेकजाँच गरेको थियो।
चेकजाँचका क्रममा मोटरसाइकल चालक इटहरी उपमहानगरपालिका–२० का ३१ वर्षीय दिपेन्द्र राईको साथबाट ब्राउन सुगरजस्तो देखिने पदार्थ ५.०४ ग्राम फेला परेको प्रहरीले जनाएको छ।
प्रहरीले राईलाई उक्त पदार्थ र मोटरसाइकलसहित नियन्त्रणमा लिई जिल्ला प्रहरी कार्यालय सुनसरीमा ल्याएको छ। घटनाबारे थप अनुसन्धान भइरहेको जिल्ला प्रहरी कार्यालय सुनसरीले जनाएको छ।
