बाजुरामा पहिरोमा पुरिएर २० वर्षीया युवतीको मृत्यु, दुई जना घाइते
बाजुरा । त्रिवेणी नगरपालिका–९ ताम्सुमा अविरल वर्षापछि आएको पहिरोमा परी एक युवतीको मृत्यु भएको छ भने दुई जना घाइते भएका छन्।
मृत्यु हुनेमा स्थानीय कर्ण थापाकी २० वर्षीया छोरी प्रतिक्षा थापा रहेकी छन्। पहिरोमा पुरिएर बेपत्ता भएकी उनको प्रहरी र स्थानीयवासीले खोजी गर्ने क्रममा घटनास्थलमै मृत अवस्थामा शव फेला पारेका हुन्।
पहिरोमा परी त्रिवेणी नगरपालिका–९ का ४० वर्षीय धर्म थापा र सोही स्थानकी ४० वर्षीया धौलीदेवी रावल घाइते भएका छन्। दुवै जनालाई उद्धार गरी उपचारका लागि जिल्ला अस्पताल मार्तडी पठाइएको छ।
पहिरोले दुई वटा घर पूर्ण रूपमा पुरिएर क्षतिग्रस्त भएका छन्। साउन २८ गते बेलुकीदेखि लगातार परेको अविरल वर्षाका कारण पहिरो गएको प्रहरीले जनाएको छ।
