खोटाङमा काठले किचेर धनकुटाका एक युवकको मृत्यु
खोटाङ, साउन २९ गते । ट्याक्टरमा काठ लोड गर्ने क्रममा काठले किचेर खोटाङमा धनकुटाका एक युवकको मृत्यु भएको छ।
मृत्यु हुनेमा धनकुटाको पाख्रिबास नगरपालिका–३ का ३५ वर्षीय लिला मगर रहेका छन्। दिप्रुङ चुइचुम्मा गाउँपालिका–५ सप्तेश्वर छितापोखरीस्थित पञ्चमी–रोक्सिङ भञ्ज्याङ सडकमा शुक्रबार बिहान मगरको काठले किचेर मृत्यु भएको हो।
स्थानीयका अनुसार काठ बोकेको ट्याक्टर सडकमा पल्टिएपछि उठाएर पुनः काठ लोड गर्ने क्रममा दुर्घटना भएको हो। बिहान करिब ४ बजे को २ त ९६९९ नम्बरको ट्याक्टरमा उत्तिसको मुडा लोड गरी डोरीले बाँध्ने क्रममा चिप्लिएर मगर मुडासँगै लडेका थिए। सोही क्रममा काठले किच्दा उनको घटनास्थलमै मृत्यु भएको जिल्ला प्रहरी कार्यालय खोटाङले जनाएको छ।
घटनापछि ट्याक्टरसहित चालक धनकुटाका १९ वर्षीय सुनिल गुरुङलाई स्थानीय प्रहरी चौकी छितापोखरीले नियन्त्रणमा लिएको छ।
घटनाबारे थप अनुसन्धान गर्न जिल्ला प्रहरी कार्यालय खोटाङबाट प्रहरी निरीक्षक निराजन बस्नेतको नेतृत्वमा प्रहरी टोली घटनास्थलतर्फ खटिएको कार्यालयले जनाएको छ।
