इटहरीबाट धनकुटाका एक जना सहित दुई युवक पक्राउ
सुनसरी । सुनसरीको इटहरी उपमहानगरपालिका–२ डम्फु चोकबाट लागूऔषध ट्याब्लेट तथा क्याप्सुलसहित दुई युवक पक्राउ परेका छन्।
जिल्ला प्रहरी कार्यालय सुनसरीका अनुसार सोमबार साँझ करिब ६ बजे लागूऔषध बिक्री–वितरण भइरहेको भन्ने गोप्य सूचनाका आधारमा कोशी प्रदेश प्रहरी कार्यालय विराटनगरको PIT र सामुदायिक प्रहरी बिट हलगडाबाट खटिएको संयुक्त प्रहरी टोलीले उनीहरूलाई पक्राउ गरेको हो।
प्रहरीले मोटरसाइकल रोकी बसिरहेका अवस्थामा प्रदेश ०१–०३–०४७ प ११०८ नम्बरको मोटरसाइकलका चालक धनकुटाको सहिदभूमि गाउँपालिका–३ घर भई हाल इटहरी–२ बस्ने २२ वर्षीय उज्वल राई र इटहरी–४ बस्ने २१ वर्षीय सविन मगरलाई शंका लागेर खानतलासी गरेको थियो।
खानतलासीका क्रममा उनीहरूको साथबाट ट्रामाडोल ६१० क्याप्सुल र डिसिक्लोमाइन ६१० ट्याब्लेट बरामद भएको प्रहरीले जनाएको छ।
दुवै जनालाई बरामद लागूऔषध र मोटरसाइकलसहित नियन्त्रणमा लिएर इलाका प्रहरी कार्यालय धरानमा लगिएको छ। घटनाबारे थप अनुसन्धान भइरहेको जिल्ला प्रहरी कार्यालय सुनसरीले जनाएको छ।
