झाडीमा लुकाइएको करिब १०८ किलो गाँजा बरामद
धनुषा । धनुषामा झाडीभित्र लुकाएर राखिएको १०७ किलो ९९८ ग्राम अवैध लागूऔषध गाँजा प्रहरीले बरामद गरेको छ।
धनुषाको नगराइन नगरपालिका–५ स्थित खिरखिरिया जाने भित्री सडकको छेउमा रहेको झाडीमा गाँजा लुकाएर राखिएको गोप्य सूचना पाएपछि भदौ १८ गते राति करिब २ः३० बजे इलाका प्रहरी कार्यालय लग्माजटहीबाट प्रहरी टोली परिचालन गरिएको थियो।
प्रहरी टोलीले उक्त स्थानमा खोजतलास गर्दा प्लास्टिकमा बेरिएका ९ पोका गाँजा फेला पारी नियन्त्रणमा लिएको थियो। इलाका प्रहरी कार्यालय लग्माजटहीमा ल्याएर प्लास्टिकसहित तौल गर्दा गाँजाको तौल १०९ किलो रहेको थियो।
पछि जिल्ला प्रहरी कार्यालय धनुषामा ल्याई प्लास्टिक हटाएर तौल गर्दा गाँजाको वास्तविक तौल १०७ किलो ९९८ ग्राम रहेको प्रहरीले जनाएको छ।
बरामद गाँजा आवश्यक अनुसन्धान तथा कानुनी कारबाहीका लागि जिल्ला प्रहरी कार्यालय धनुषामा राखिएको छ। घटनाबारे थप अनुसन्धान भइरहेको प्रहरीले जनाएको छ।
