सुनसरी, झापा र धनकुटाबाट एकै दिन ब्राउन सुगर तथा गाँजा सहित सात जना पक्राउ
विराटनगर । कोशी प्रदेशका सुनसरी, झापा र धनकुटा जिल्लाका विभिन्न स्थानबाट प्रहरीले लागूऔषधसहित सात जनालाई पक्राउ गरेको छ।
प्रहरीका अनुसार भदौ १८ गते सुनसरीको धरान उपमहानगरपालिका–५ बाट ३१ वर्षीय मनिराज भुजेल पक्राउ परेका छन्। कोशी प्रदेश प्रहरी कार्यालय विराटनगरको प्रादेशिक अनुसन्धान समूह (PIT) र इलाका प्रहरी कार्यालय धरानबाट खटिएको टोलीले उनको घरबाट ४ ग्राम ९१० मिलिग्राम ब्राउन सुगर बरामद गरी उनलाई पक्राउ गरेको हो।
त्यस्तै, प्रहरी चौकी कप्तानगञ्जबाट खटिएको टोलीले देवानगञ्ज गाउँपालिका–३ बाट सोही गाउँपालिका–१ का सन्दिप कुमार मेहतालाई २१० मिलिग्राम ब्राउन सुगर र को.२५ प ७८९७ नम्बरको मोटरसाइकलसहित नियन्त्रणमा लिएको छ।
झापाको दमक नगरपालिका–५ बाट इलाका प्रहरी कार्यालय दमकको टोलीले इलामको चुलाचुली गाउँपालिका–५ का ३५ वर्षीय हिरालाल विश्वकर्मालाई ३ ग्राम २३० मिलिग्राम ब्राउन सुगरसहित पक्राउ गरेको छ।
यसैगरी, प्रहरी चौकी टाघनडुब्बाबाट खटिएको टोलीले झापा गाउँपालिका–४ बाट बाह्रदशी गाउँपालिका–७ का २७ वर्षीय सन्तोष क्षेत्रीलाई १ ग्राम २६ मिलिग्राम ब्राउन सुगरसहित नियन्त्रणमा लिएको प्रहरीले जनाएको छ।
उता, धनकुटाको साँगुरीगढी गाउँपालिका–६, भेडेटार चोकबाट प्रहरीले ठूलो परिमाणमा गाँजा बरामद गरेको छ। इलाका प्रहरी कार्यालय भेडेटारबाट खटिएको टोलीले १५ किलो ७३ ग्राम गाँजासहित ओसारपसारमा संलग्न रहेको आरोपमा साँगुरीगढी गाउँपालिका–४ का भीमबहादुर लिम्बु, सागर लिम्बु र वीरबहादुर लिम्बुलाई पक्राउ गरेको हो।
उनीहरूको साथबाट को.२८ प ७२७७ र प्र.१–०२–५८ प ६०९९ नम्बरका दुई वटा मोटरसाइकलसमेत बरामद गरिएको प्रहरीले जनाएको छ।
यसरी सुनसरी, झापा र धनकुटाबाट एकै दिनको अवधिमा ब्राउन सुगर तथा गाँजासहित सात जना पक्राउ परेका छन्। पक्राउ परेकाहरूमाथि लागूऔषधसम्बन्धी कसुरमा थप अनुसन्धान भइरहेको प्रहरीले जनाएको छ।
