विराटनगरमा सार्वजनिक स्थलमा युवतीलाई अभद्र व्यवहार गरेको आरोपमा दुई जना पक्राउ
विराटनगर । विराटनगरमा सार्वजनिक स्थलमा युवतीहरूमाथि अभद्र व्यवहार गरेको आरोपमा प्रहरीले दुई जनालाई पक्राउ गरेको छ।
मोरङ प्रहरीका अनुसार भदौ १९ गते दिउँसो करिब १२ः३० बजे विराटनगर महानगरपालिका–९ महेन्द्रचोकमा मोटरसाइकलमा सवार दुई पुरुषले विद्यालय पोशाकमा सडकमा हिँडिरहेका दुई युवतीलाई अभद्र व्यवहार गरेको भिडियो सामाजिक सञ्जालमार्फत सार्वजनिक भएको थियो।
भिडियो प्राप्त भएपछि जिल्ला प्रहरी कार्यालय मोरङबाट खटिएको टोलीले घटनामा संलग्न व्यक्तिको खोजी गरेको थियो। खोजीका क्रममा प्रहरीले विराटनगरबाट दुई जनालाई पक्राउ गरेको हो।
पक्राउ पर्नेमा विराटनगर महानगरपालिका–४ का ३५ वर्षीय महेश कुमार मण्डल र बारा परवानीपुर गाउँपालिका–१ घर भई हाल विराटनगर बस्दै आएका ३३ वर्षीय अखिलेश कुमार प्रसाद रहेका छन्।
उनीहरूविरुद्ध अभद्र व्यवहारसम्बन्धी कसुरमा म्याद थप गरी थप अनुसन्धान भइरहेको जिल्ला प्रहरी कार्यालय मोरङले जनाएको छ।
