इटहरीमा सर्पदंशकी ८ वर्षीया बालिकाको मृत्यु
इटहरी । घरभित्र खेलिरहेका बेला गोमन सर्पले डसेकी सुनसरीको इटहरीकी ८ वर्षीया बालिकाको उपचारका क्रममा मृत्यु भएको छ ।
इटहरी उपमहानगरपालिका–५ की अस्मित चौहानकी छोरी आस्वाना चौहानलाई बुधबार साँझ घरभित्र खेल्ने क्रममा गोमन सर्पले बायाँ हातमा टोकेको थियो । सर्पले टोकेको कुरा उनले तत्काल अभिभावकलाई जानकारी गराएकी थिइनन् । अवस्था गम्भीर भएपछि मात्रै परिवारले घटनाबारे थाहा पाएको थियो ।
परिवारका अनुसार बालिकाले सर्पले टोकेको जानकारी दिएपछि हेर्दा टोकेको हातबाट रगत बगिरहेको थियो । त्यसपछि उनलाई तत्काल नेपाली सेनाले इटहरीमा सञ्चालन गरेको सर्पदंश उपचार केन्द्रमा लगिएको थियो । अभिभावकका अनुसार बालिकालाई करिब साँझ ६ बजे उपचार केन्द्र पुर्याइएको थियो । तर, त्यहाँ १३ वर्षमुनिका बालबालिकाको उपचार गर्न नसकिने जानकारी दिइएको परिवारको भनाइ छ ।
सर्पदंश केन्द्रतर्फ लैजाँदै गर्दा बालिकालाई बान्तासमेत भएको थियो । त्यसपछि उनलाई धरानस्थित बीपी कोइराला स्वास्थ्य विज्ञान प्रतिष्ठान पुर्याइएको काका मनीराज चौहानले बताए ।
उनका अनुसार प्रतिष्ठानमा उपचार सुरु गरिए पनि पीआईसीयू (बाल सघन उपचार कक्ष) खाली नभएको जानकारी दिइएको थियो । सर्पको विषका कारण अवस्था गम्भीर बनेकी बालिकालाई पीआईसीयूमा राखेर उपचार गर्नुपर्ने चिकित्सकले बताए पनि तत्काल उक्त सेवा उपलब्ध हुन नसकेको परिवारको भनाइ छ ।
त्यसपछि थप उपचारका लागि बालिकालाई मोरङको बूढीगंगास्थित विराट शिक्षण अस्पताल लगिएको थियो । साँझ करिब ७ः५० बजे अस्पताल पुर्याइएकी बालिकालाई चिकित्सकले करिब ८ः१७ बजे मृत घोषणा गरेका थिए ।
