विराटनगरबाट २४ किलो गाँजा सहित दुई भारतीय नागरिक पक्राउ
विराटनगर । मोरङको विराटनगर महानगरपालिका–१८ रेल्वेबाट २४ किलो ४ सय ग्राम गाँजासहित दुई भारतीय नागरिक पक्राउ परेका छन्।
पक्राउ पर्नेमा भारत बिहारको अररिया जिल्ला फुलकाहा–१ का २० वर्षीय प्रवेश कुमार साह र सोही ठाउँका २० वर्षीय सुरेश कुमार साह रहेका छन्।
नेपालबाट भारततर्फ जाँदै गरेको बीआर ३८ एई ०४९७ नम्बरको मोटरसाइकलमा सवार उनीहरूलाई अस्थायी प्रहरी पोष्ट भेडीयारीबाट खटिएको प्रहरी टोलीले शंका लागेर जाँच गर्ने क्रममा दुई वटा कालो प्लास्टिकको पोकामा लुकाएर राखिएको गाँजा फेला पारेको हो।
दुवै जनालाई मोटरसाइकलसहित नियन्त्रणमा लिई इलाका प्रहरी कार्यालय रानीमा राखेर थप अनुसन्धान भइरहेको प्रहरीले जनाएको छ।
