मोरङमा रड प्रहार गरी श्रीमानको हत्या गरेको आरोपमा श्रीमती सहित दुई जना पक्राउ
मोरङ । मोरङको जहदा गाउँपालिका–२ मोहनपुरमा रड प्रहार गरी एक पुरुषको हत्या गरेको आरोपमा मृतककी श्रीमतीसहित दुई जना पक्राउ परेका छन्।
प्रहरीका अनुसार स्थानीय ४० वर्षीय बुधराम सोरेनको आइतबार राति करिब ९ बजे रड प्रहारबाट मृत्यु भएको हो। सोरेनलाई उनकी ३५ वर्षीया श्रीमती कमली बास्के र भारतको बिहारका २७ वर्षीय सुनिल मिश्रले टाउकोमा रड प्रहार गरेको प्रारम्भिक जानकारी प्राप्त भएको प्रहरीले जनाएको छ।
घटनाको सूचना पाएलगत्तै प्रहरीले घटनामा प्रयोग भएको रडसहित मिश्रलाई नियन्त्रणमा लिएको थियो। घटनापछि फरार रहेकी कमलीलाई सोमबार बिहान करिब साढे ७ बजे खेतमा भाग्दै गरेको अवस्थामा पक्राउ गरिएको प्रहरीले जनाएको छ।
पक्राउ परेका दुवै जनालाई थप अनुसन्धान तथा कानुनी कारबाहीका लागि इलाका प्रहरी कार्यालय रानीमा राखिएको छ। घटनाबारे थप अनुसन्धान भइरहेको प्रहरीले जनाएको छ।
