४४३ किलो गाँजा सहित दुई भारतीय नागरिक पक्राउ
काठमाडौं, ४ मंसिर । ४४३ किलो गाँजासहित दुई भारतीय नागरिक पक्राउ परेका छन् । भारतीय कन्टेनर गाडीमा फल्स बटम बनाई लुकाइछिपाई ल्याउँदै गरेको अवस्थामा प्रहरीले शुक्रबार चितवनको राप्ती नगरपालिका–१ लोथरस्थित प्रहरी चेकिङ पोइन्टमा उनीहरूलाई पक्राउ गरेको हो ।
शुक्रबार बिहान ९ बजेतिर इलाका प्रहरी कार्यालय भण्डारा र अस्थायी प्रहरी पोष्ट लोथरबाट खटिएको संयुक्त टोलीले हेटौँडाबाट चितवनतर्फ आउँदै गरेको एनएल ०१०७७९२ नम्बरको भारतीय कन्टेनर चेकजाँच गर्ने क्रममा चालक सिट पछाडिको क्याबिनमा फल्स बटम बनाई लुकाइछिपाई ल्याइएको अवस्थामा ४४३ किलो गाँजा फेला पारी बरामद गरिएको प्रहरीले जनाएको छ ।
चितवन प्रहरीका अनुसार बरामद गरिएको गाँजासहित कन्टेनर चालक सत्यम कुमार र सहचालक रौनक कुमारलाई पक्राउ गरी बरामद गाँजाको सम्बन्धमा थप अनुसन्धानसमेत भइरहेको छ ।

