‘माकाफुँई’ नदेखाउन सचिव भट्टराईलाई केन्द्रीय नेताको चेतावनी !
नेकपा एमालेका अध्यक्ष केपी ओलीले नेवारी भाषाको शब्द ‘माकाफुँई’लाई राजनीतिमा नर्बिसने शब्द बनाए । माओबादी केन्द्र र उसका अध्यक्ष प्रचण्डले बाँदरको जस्तो फुर्ती (त्यस्तो फुर्ति जसको कुनै अर्थ हुन्न, ताइ न तुइको) देखाएको अर्थमा उनले सो उपमाको प्रयोग गरेका थिए । नेवारका ज्वाईँ ओलीले माओवादीलाई भिराएको सो उपमा अहिले एमालेभित्रै चल्तिमा देखिएको छ, त्यो पनि आफ्नैको उछितो काढ्न ।
सचिव योगेश भट्टराईले नेतृत्व हस्तान्तरणको बहश उठाएपछि ओली निकट नेता बिष्णु रिमाल सार्वजनिकरुपमै खरो उत्रिएका छन् । उनले भट्टराईले ‘माकाफुँई’ देखाएको भन्दै ट्विटेका छन् । ओलीकै जस्तो भाषाशैलीमा रिमालले भट्टराईलाई दनक दिएका हुन् । ओलीकै भरथेकमा चुनाव जितेर ओलीसँगै सिँघुरी खेल्न खोजेको भन्दै रिमालले कडा टिप्पणी लेखेपछि सचिव भट्टरार्इ प्रत्युत्तर दिएका छन् ।
रिमाललाई ३५ बर्षदेखि चिनेको र उनी आफूप्रति जेजस्तो भएपनि आफू रिमालप्रति सदैव हितैषी रहने भट्टराईले उल्लेख गरेका छन् । रिमाल ओली प्रधानमन्त्री हुँदा प्रमुख राजनीतिक सल्लाहकार थिए ।
ओली र भट्टराईबीचको छेड्खानीलाई एमालेभित्रको अन्तरसंघर्षका रुपमा हेरिएको छ । महासचिव ईश्वर पोखरेललाई प्रधानमन्त्री बनाउने प्रस्ताव भट्टराईले गरेको समाचार बाहिरिएसँगै एमालेभित्र तरंग पैदा भएको हाे । पोखरेलले सो प्रस्तावमा समर्थन जनाएमा एमालेभित्रको राजनीतिमात्रै होइन, देशकै राजनीतिले नयाँ मोड लिने निश्चित छ । – नेपालआजबाट
