म्याराडोनाको जर्सीमा मेस्सीको पोज
न्युयोर्क। अर्जेन्टिनी फुटबल सुपर स्टार लियोनल मेस्सीले आइतबार राती एउटा भिडियो र एउटा फोटो इन्स्टाग्रामको स्टोरीमा सेयर गरेका छन्।
डिएगो म्याराडोनाले सन् १९९४ को विश्वकपमा लगाएको जर्सीमा पोज दिएर खिचेको फोटो र भिडियो स्टोरीमा सेयर गरेको देखिन्छ। भिडियोमा उनले जर्सीको अगाडि र पछाडि दुवै भाग देखाएको देखिन्छ भने फोटोमा खाली खुट्टामा देखिन्छन्। उक्त पोजबारे मेस्सीले केही उल्लेख गरेका छन्।
सन् १९९४ को विश्वकपमा म्याराडोनाले लगाएको जर्सी हो वा त्यसको डुब्लिकेट भन्नेबारे केहीपनि खुलाइएको छैन। त्यस विश्वकपमा अर्जेन्टिना प्रिक्वाटर फाइनलबाटै बाहिरिएको थियो।
त्यसअघि अर्जेन्टिनाले सन् १९८६ र १९९० को दुवै विश्वकपमा फाइनल यात्रा तय गरेको थियो। एउटा अनुमान चाँही के गर्न सकिन्छ भने मेस्सी यतिबेला अमेरिकामा छन् र सन् १९९४ को विश्वकप पनि अमेरिकामै आयोजना भएको थियो। मेस्सीले गतवर्ष मात्र विश्वकप उपाधि जितेका थिए।
त्यसअघि अर्जेन्टिनाले अन्तिमपटक सन् १९८६ को विश्वकप जितेको थियो। त्यतिबेला म्याराडोनाको प्रदर्शन निणार्यक रहेको थियो। यसपटक, मेस्सीको निर्णायक प्रदर्शनमा अर्जेन्टिना ३६ वर्षपछि विश्व विजेता बनेको थियो। मेस्सी यतिबेला अमेरिकामा व्यावशायीक फुटबल खेलिरहेका छन्।
उनले इन्टर मियामीका लागि २ खेलमा ३ गोल र एक असिस्ट गरेका छन्। फ्रान्सको पेरिस सेन्ट जर्मन–पीएसजीबाट विदा भइरहँदा मेस्सी कहाँ जालान् भन्ने विभिन्न अनुमानहरु भएका थिए। तर उनले अप्रत्यासितरुपमा अमेरिकाको मेजर सकर लिग(एमएलएस रोजे। मेस्सीले व्यावसायीक फुटबल करियर अमेरिकामा टुंग्याउँछन् वा अन्त कँही भन्नेबारे पनि केही बताएका छैनन्।
