धनकुटाका सात वटै पालिकामा एमालेले संगठन कमिटी बनाउँदै
धनकुटा । नेकपा एमालेले धनकुटाका सात वटै पालिकामा संगठन कमिटी निर्माण गर्ने भएको छ । पालिका कमिटीहरूको अवधि सकिएकाले अधिवेशनसम्म तत्कालका लागि सात वटै पालिकामा संगठन कमिटी निर्माण गर्न थालिएको हो ।
पाख्रीवास, महालक्ष्मी र छथरजोरपाटीमा संगठन कमिटी निर्माण भइसकेको छ । अब, चौबिसे, साँगुरीगढी, सहिदभूमि र धनकुटा नगरमा संगठन कमिटी निर्माण गरिने एमाले धनकुटाका प्रचार तथा प्रकाशन विभाग प्रमुख रबिन कटेलले जानकारी दिए । संगठन कमिटी निर्माणका लागि एमालेका केन्द्रिय सदस्य तथा धनकुटा इन्चार्ज राजेन्द्र राईको नेतृत्वमा नेताहरू पालिका–पालिका पुगिरहेका छन् । केन्द्रिय सदस्य सकुन्तला बस्नेत, प्रदेश सचिवालय सदस्य उज्वल किराँती, जिल्ला अध्यक्ष शिव आङ्ला, उपाध्यक्ष चिन्तन तामाङ, सचिव पर्शुराम नेपाल, उपसचिव नैन विश्वकर्मासहितका नेताहरू संगठन कमिटी निर्माणको अभियानमा जुटिरहेका छन् । केन्द्र, प्रदेश र जिल्ला कमिटीका नेताहरू पनि गाउँ–गाउँ पुगिरहेका छन् ।
गत मङ्गलबार पाख्रीवास नगरमा संगठन कमिटी निर्माण गरिएको हो । नगर कमिटी अध्यक्ष शान्तिराम गौतम जिल्ला कमिटीमा मनोनित भएकाले सिताराम राईको नेतृत्वमा संगठन कमिटी निर्माण गरिएको छ । महालक्ष्मीमा शुक्रबार संगठन कमिटी बनाइएको छ । निवर्तमान नगर कमिटी अध्यक्ष किरण गिरीले नै संगठन कमिटी अध्यक्षको जिम्मेवारी पाएका छन् । शनिवार छथर जोरपाटीमा इन्द्र सारुमगरको नेतृत्वमा संगठन कमिटी निर्माण गरिएको छ ।
कार्यक्रममा एमाले जिल्ला अध्यक्ष शिव आङ्लाले संगठन कमिटी घोषणा गरे । केन्द्रिय सदस्य राजेन्द्र राईले उनीहरूलाई पद तथा गोपनीयताको शपथ ग्रहण गराएका छन् । सो क्रममा बोल्दै एमाले केन्द्रिय सदस्य राईले एमालेमय बनाउने गरी अभियानमा जुट्न सबैलाई आग्रह गरे । उनले तोकिएको जिम्मेवारी अनुसार काम गर्न नेता कार्यकर्तालाई निर्देशन पनि दिए ।
अब, आइतबार चौबिसे र सोमबार साँगुरीगढीमा पालिका कमिटी निर्माण गरिदैछ । असोज २ गते धनकुटा नगर र ७ गते सहिदभूमिमा संगठन कमिटी निर्माण गर्ने एमालेको योजना छ । तत्कालका लागि संगठन कमिटी बनाइएको भएपनि आगामी मंसिर महिनाभित्र सात वटै पालिका कमिटीको अधिवेशन सम्पन्न गरिने एमाले जिल्ला सचिव एवं संगठन विभाग प्रमुख पर्शुराम नेपालले जानकारी दिए ।
