नेपाली कांग्रेस मोरङ–१ सम्पर्क कार्यालय भद्रमारीमा उद्घाटन
उर्लाबारी । नेपाली कांग्रेस मोरङ निर्वाचन क्षेत्र नम्बर १ को सम्पर्क कार्यालय उर्लाबारी–४ भद्रमारीमा उद्घाटन गरिएको छ। उद्घाटन कार्यक्रमको सभापतित्व क्षेत्रीय सभापति शंकर राईले गरेका थिए भने प्रमुख अतिथि प्रदेश सह–महामन्त्री तथा प्रतिनिधिसभा सदस्यका उम्मेदवार खड्गबहादुर फागो रहेका थिए।
कार्यक्रममा बोल्दै सभापति राईले शान्त र जिम्मेवार ढंगले अघि बढ्दै लागेका आरोपहरू चिर्दै विभिन्न समिति तथा संगठनहरू सक्रिय रूपमा लाग्नुपर्ने आवश्यकता औंल्याए। उनले आजै लेटाङमा समेत कार्यक्रम रहेको जानकारी गराए।
नेपाल तरुण दलका केन्द्रीय सदस्य सचिन शाक्यले सबै एकजुट भएर चुनावी अभियानमा लाग्नुपर्नेमा जोड दिए। उर्लाबारीका संस्थापक सभापति नरेश थापाले देशका लागि पार्टीले गरेको त्यागको स्मरण गर्दै युवा नेतालाई विजयी गराउन सबैले सक्रिय भूमिका खेल्नुपर्ने बताए। उनले पार्टीलाई अझ सशक्त बनाउँदै अगाडि बढाउनुपर्ने आवश्यकता औंल्याए।
महिला संघ क्षेत्रीय सभापति तथा महाधिवेशन प्रतिनिधि गोमा नेपालले जीत निश्चित रहेको दाबी गर्दै दुखेका मनहरू एक भएर जिम्मेवारी बहन गर्न आग्रह गरिन्।
उम्मेदवार खड्गबहादुर फागोले मोरङ निर्वाचन क्षेत्र नम्बर १ को मुहार परिवर्तन गर्ने प्रतिबद्धता व्यक्त गर्दै आफूलाई मतदान गरी विजयी गराउन मतदातासँग आग्रह गरेका छन् ।
