धनकुटाको साँगुरीगढीमा प्रथम टोल स्तरीय महिला तथा पुरुष फुटबल प्रतियोगिता सम्पन्न
हिराराज राई, धनकुटा । धनकुटा जिल्लाको साँगुरीगढी गाउँपालिका वडा नं. १० भुल्के धारापानीमा प्रथम टोलस्तरीय महिला तथा पुरुष फुटबल प्रतियोगिता सम्पन्न भएको छ। प्रतियोगिता असार १६ र १७ गते सञ्चालन गरिएको थियो।
प्रतियोगिताको आयोजना साँगुरीगढी गाउँपालिका १० नं. वडा कार्यालय ताम्राङ्ग धनकुटाले गरेको थियो भने लालीगुराँस युवा क्लब साँगुरीगढी गाउँपालिका वडा नं. १० ताम्राङ्ग धनकुटाले व्यवस्थापन गरेको थियो।
फाइनल खेलमा पुरुषतर्फ धारापानी ‘ए’ले धारापानी भेट्रान्सलाई ४–१ गोलअन्तरले पराजित गर्दै उपाधि जितेको हो। त्यसैगरी महिलातर्फ धारापानी ‘ए’ले धारापानी ‘बी’लाई २–१ गोलअन्तरले पराजित गर्दै उपाधि जित्न सफल भएको आयोजकले जनाएको छ।
प्रतियोगितामा पुरुषतर्फ विजेता टोलीले नगद १८ हजार रुपैयाँसहित मेडल र प्रमाणपत्र प्राप्त गरेको छ भने उपविजेता टोलीले नगद १२ हजार रुपैयाँसहित मेडल र प्रमाणपत्र प्राप्त गरेको छ। महिलातर्फ विजेता टोलीले नगद १२ हजार रुपैयाँसहित मेडल र प्रमाणपत्र प्राप्त गरेको छ भने उपविजेता टोलीले नगद ६ हजार रुपैयाँसहित मेडल र प्रमाणपत्र प्राप्त गरेका छन्।
पुरुषतर्फ सर्वाधिक गोलकर्ता माधव राई, उत्कृष्ट गोलकिपर संगम राई, उत्कृष्ट फरवार्ड कमल राई र उत्कृष्ट खेलाडी टंकराज राई घोषित भएका छन्। महिलातर्फ सर्वाधिक गोलकर्ता सानू राई, उत्कृष्ट गोलकिपर अनिता राई, उत्कृष्ट फरवार्ड पृन्सा राई र उत्कृष्ट खेलाडी आयुषा राई घोषित भएका छन्।
प्रतियोगितामा वडा नं. १० भित्रका पुरुषतर्फ ९ टोली र महिलातर्फ ४ टोलीको सहभागिता रहेको आयोजकले जनाएको छ।
स्थानीयस्तरमा खेलकुदको विकास गर्ने उद्देश्यका साथ प्रतियोगिता आयोजना गरिएको आयोजकको भनाइ छ।
