झापामा २३.५५ ग्राम ब्राउन सुगर सहित एक जना पक्राउ
झापा, असार २० – झापाको अर्जुनधारा नगरपालिका–८ सब्जीलाइन क्षेत्रमा प्रहरीले २३.५५ ग्राम ब्राउन सुगरसहित एक जनालाई पक्राउ गरेको छ।
प्रहरीका अनुसार बिर्तामोडबाट शनिश्चरेतर्फ आउँदै गरेको बा ५७ प ७७३३ नम्बरको मोटरसाइकललाई नियमित चेकजाँच गर्ने क्रममा चालक अर्जुनधारा नगरपालिका–८ निवासी अन्दाजी ४१ वर्षीय सरोज गहतराज पक्राउ परेका हुन्।
उनको साथबाट ‘N10’ लेखिएको खोलबिनाको सेतो ट्याब्लेट ३० थान, २३ ग्राम ५५० मिलिग्राम ब्राउन सुगरजस्तो देखिने लिसाइलो पदार्थ तथा दुई थान मोबाइल बरामद गरिएको प्रहरीले जनाएको छ।
प्रहरीले बरामद लागुऔषध, मोटरसाइकल तथा पक्राउ परेका गहतराजलाई नियन्त्रणमा लिएर लागूऔषध सम्बन्धी कसुरमा थप अनुसन्धान अघि बढाएको छ।
