सर्वोच्चद्वारा पूर्वसांसद कोइरी प्रकरणमा सरकारलाई ‘शो कज’
काठमाडौं। सर्वोच्च अदालतले नेकपा (एमाले) का पूर्वसांसद लक्ष्मी कोइरी महतोलाई पक्राउ गरी थुनामा पठाउनुको स्पष्ट कारण पेस गर्न सरकारका नाममा आदेश जारी गरेको छ।
न्यायाधीश नित्यानन्द पाण्डेयको एकल इजलासले पूर्वसांसद कोइरीका छोरा मनोजकुमार महतोले दायर गरेको रिट निवेदनमाथि सुनुवाइ गर्दै यस्तो आदेश दिएको हो। रिट निवेदनमा आफ्ना बाबुलाई गैरकानुनी रूपमा थुनामा राखिएको दाबी गरिएको छ।
मधेश आन्दोलनका क्रममा सशस्त्र प्रहरीका सहायक निरीक्षक थमन विकको हत्यामा संलग्न रहेको आरोपमा कोइरीविरुद्ध मुद्दा चलिरहेको थियो। सोही मुद्दामा उच्च अदालत जनकपुरले जिल्ला अदालतको यसअघिको सफाइ दिने फैसला उल्ट्याउँदै गत साता कोइरीलाई ५ वर्ष कैद सजाय सुनाएको थियो।
उच्च अदालतको फैसला लगत्तै कोइरीलाई पक्राउ गरी थुनामा पठाइएको थियो। रिट निवेदक मनोजकुमार महतोले १० वर्षभन्दा कम सजाय पाएका व्यक्तिले थुनाबाहिर रहेरै सर्वोच्चमा पुनरावेदन गर्न पाउने कानुनी व्यवस्था रहेको भन्दै, मुद्दाको फैसला अन्तिम नहुँदै गरिएको गिरफ्तारी गैरकानुनी भएको जिकिर गरेका छन्।
यस सम्बन्धमा सर्वोच्च अदालतले सरकारी पक्षसँग थुनामा पठाउनुको कानुनी आधार र कारण माग गरेको छ।
