मर्निङवाकमा निस्किएका ६५ वर्षीय बोटेको बाघको आक्रमणबाट मृत्यु
चितवन । चितवनको भरतपुर महानगरपालिका–२८ जितपुरमा मर्निङवाकमा निस्किएका एक वृद्धको बाघको आक्रमणबाट मृत्यु भएको छ।
मृत्यु हुनेमा भरतपुर महानगरपालिका–२८ जितपुरका ६५ वर्षीय मंगले बोटे रहेका छन्। उनी मंगलबार बिहान करिब ५ बजे मर्निङवाकका लागि घरबाट निस्किएका थिए। त्यसपछि एक्कासी बेपत्ता भएपछि परिवार तथा स्थानीयले उनको खोजी सुरु गरेका थिए।
बिहान करिब ८ बजे उक्त क्षेत्रमा बाघ देखिएको सूचना प्राप्त भएपछि प्रहरी टोली घटनास्थलमा पुगेको थियो। त्यसपछि नेपाली सेना, राष्ट्रिय निकुञ्ज प्रशासनको टोली तथा स्थानीय जनप्रतिनिधिको सहयोगमा हात्ती प्रयोग गरी बोटेको खोजी थालिएको थियो।
खोजी गर्ने क्रममा दिउँसो ४ः२० बजे घटनास्थलबाट करिब ४–५ किलोमिटर पूर्वतर्फ रहेको राप्ती हरियाली तथा बेथरी मध्यवर्ती सामुदायिक वनमा बाघले आक्रमण गरेको अवस्थामा बोटेको शव फेला परेको प्रहरीले जनाएको छ।
फेला परेको शव मंगले बोटेको भएको उनका छोराले सनाखत गरेका छन्। घटनाबारे थप अनुसन्धान भइरहेको प्रहरीले जनाएको छ।
