धनकुटामा १५ किलो ७३ ग्राम गाँजा सहित तीन जना पक्राउ
धनकुटा । धनकुटाको साँगुरीगढी गाउँपालिका–६ भेडेटारबाट १५ किलो ७३ ग्राम गाँजासहित तीन जना पक्राउ परेका छन्।
जिल्ला प्रहरी कार्यालय धनकुटाका अनुसार बिहीबार बिहान करिब ७ बजे कोशी लोकमार्गअन्तर्गत भेडेटार चोकमा इलाका प्रहरी कार्यालय भेडेटारबाट खटिएको प्रहरी टोलीले चेकजाँच गर्ने क्रममा उनीहरूलाई पक्राउ गरेको हो।
धनकुटाबाट धरानतर्फ जाँदै गरेको को २८ प ७२७७ नम्बरको मोटरसाइकल रोकी जाँच गर्दा चालक साँगुरीगढी गाउँपालिका–४ ज्यामिरेका ४४ वर्षीय भीमबहादुर लिम्बु र मोटरसाइकलमा पछाडि सवार सोही गाउँपालिका–फाक्सिबका २३ वर्षीय सागर लिम्बुको साथबाट दुईवटा कालो प्लास्टिकमा प्याक गरी झोलामा राखिएको गाँजा फेला परेको प्रहरीले जनाएको छ।
यस्तै, सोही दिशातर्फ जाँदै गरेको प्र.१–०२–५८ प ६०९९ नम्बरको मोटरसाइकल पनि रोकी जाँच गर्ने क्रममा साँगुरीगढी–४ ज्यामिरेका २३ वर्षीय वीरबहादुर लिम्बु पक्राउ परेका छन्।
प्रहरीले दुवै मोटरसाइकलसहित तीनै जनालाई नियन्त्रणमा लिएर जिल्ला प्रहरी कार्यालय धनकुटामा ल्याएको थियो। बरामद गाँजा नापतौल गर्दा १५ किलो ७३ ग्राम रहेको प्रहरीले जनाएको छ।
पक्राउ परेका तीनै जनामाथि थप अनुसन्धान भइरहेको जिल्ला प्रहरी कार्यालय धनकुटाले जनाएको छ।
