धनकुटाको पाख्रिबास स्थित जालपादेबी माबिका बिद्यार्थीले गरे बाढीपीडितका लागि एक दिनको खाजा खर्च बराबरको सहयोग
धनकुटा । भोटेकोशी नदीमा गत भदौ १० गते आएको विनाशकारी बाढीबाट प्रभावित तथा पीडित परिवारको सहयोगार्थ धनकुटाको पाख्रिबास–४ स्थित जालपादेबी माध्यमिक विद्यालयका विद्यार्थीहरूले आर्थिक सहयोग गरेका छन्।
विद्यालयमा अध्ययनरत कक्षा ६ देखि कक्षा १० सम्मका विद्यार्थीहरूले आफ्नो एक दिनको खाजा खर्च बराबरको रकम संकलन गरी ४ हजार ६५ रुपैयाँ प्रधानमन्त्री दैवी प्रकोप उद्धार कोषमा जम्मा गरेका हुन्।
बाढीबाट प्रभावित परिवारलाई सहयोग पुर्याउने उद्देश्यले विद्यार्थीहरूले आफ्नो दैनिक खाजा खर्चबाट रकम छुट्याएर सहयोग गरेका हुन्। सानै उमेरमा विपद्मा परेका नागरिकप्रति सहयोग र मानवीय भावना देखाउँदै विद्यार्थीहरूले गरेको यो पहल सराहनीय रहेको विद्यालयले जनाएको छ।
विद्यालयले बाढीपीडितको सहयोगका लागि आफ्नो तर्फबाट योगदान गर्ने विद्यार्थीहरूको प्रयासको प्रशंसा गर्दै यस कार्यमा सहभागी सम्पूर्ण विद्यार्थीहरूलाई हार्दिक धन्यवाद व्यक्त गरेको छ।
