अपडेट : संखुवासभामा भरुवा बन्दुक प्रहारबाट शिक्षकको मृत्यु, घटनामा संलग्न एक जना पक्राउ
संखुवासभा । मकालु गाउँपालिका–१ चिर्खाङस्थित कालिका आधारभूत विद्यालयमा भरुवा बन्दुक प्रहारबाट एक शिक्षकको मृत्यु भएको छ। घटनामा संलग्न रहेको आरोपमा प्रहरीले एक जनालाई पक्राउ गरेको छ।
बिहीबार साँझ करिब ७ बजे सिलिचोङ गाउँपालिका–५ याफु घर भई कालिका आधारभूत विद्यालयमा बस्दै आएका करिब ३६ वर्षीय शिक्षक नरकुबिर खम्बु राई खाना खाइसकेपछि भाँडा धुन विद्यालयबाहिर निस्किएका थिए।
त्यस क्रममा अचानक बन्दुक पड्किएको आवाज आएपछि सोही विद्यालयमा बस्दै आएकी शिक्षिका टिकामाया राई बाहिर निस्केर हेर्दा नरकुबिर ढलेको र शरीरबाट रगत बगिरहेको अवस्थामा फेला पारेकी थिइन्।
घटनाको जानकारी पाएलगत्तै प्रहरी टोली घटनास्थलमा पुगेको थियो। प्रारम्भिक अनुसन्धानका क्रममा मृतकको शरीरको पछाडिको भागमा भरुवा बन्दुकको गोली लागेको चोट फेला परेको प्रहरीले जनाएको छ।
घटनाको थप अनुसन्धानका क्रममा प्रहरीले शुक्रबार बिहान करिब ११ बजे मकालु गाउँपालिका–१ सिउँडीबारी बस्ने करिब ३३ वर्षीय पत्न कुलुङ राईलाई घटनामा प्रयोग भएको भरुवा बन्दुकसहित पक्राउ गरेको छ।
पक्राउ परेका राईमाथि घटनाबारे थप अनुसन्धान भइरहेको जिल्ला प्रहरी कार्यालय संखुवासभाले जनाएको छ।
