सुनसरीको रामधुनी स्थित चाम्लिङ होटल एण्ड लजबाट १६ ग्राम २२० मिलिग्राम ब्राउन सुगर सहित दुई जना पक्राउ
सुनसरी । सुनसरीको रामधुनी नगरपालिका–५ स्थित चाम्लिङ होटल एण्ड लजबाट १६ ग्राम २२० मिलिग्राम ब्राउन सुगरसहित दुई जना पक्राउ परेका छन्।
शुक्रबार बिहान करिब ११ बजे होटलमा लागूऔषध ब्राउन सुगर बिक्री–वितरण भइरहेको गोप्य सूचनाका आधारमा लागूऔषध नियन्त्रण ब्युरो विराटनगर र इलाका प्रहरी कार्यालय पकलीबाट खटिएको संयुक्त प्रहरी टोलीले उनीहरूलाई पक्राउ गरेको हो।
पक्राउ पर्नेमा हरिनगर गाउँपालिका–७ का ५२ वर्षीय मोजामिल अन्सारी र चाम्लिङ होटल एण्ड लज सञ्चालक रामधुनी नगरपालिका–५ की ४९ वर्षीया मनिता राई रहेका छन्।
प्रहरीले होटलमा खानतलासी गर्ने क्रममा मनिता राईले लुकाएर राखेको अवस्थामा १६ ग्राम २२० मिलिग्राम ब्राउन सुगर बरामद गरेको जनाएको छ।
पक्राउ परेका दुवै जनामाथि लागूऔषधसम्बन्धी कसुरमा थप अनुसन्धान भइरहेको प्रहरीले जनाएको छ।
