१३ दिनदेखि बेपत्ता भारतीय नागरिक रामप्रसाद : परिवारको आशा अझै फोनको घण्टीमै
सञ्जय मिश्रा/रौतहट, २२ भदौ । एक दिन आएको विनाशकारी बाढीले भौतिक संरचना मात्रै बगाएन, रसुवास्थित माथिल्लो त्रिशूली–१ जलविद्युत् आयोजनामा कार्यरत भारतीय नागरिक रामप्रसाद घोषको परिवारको चैन र आशा पनि बगाइदिएको छ।
गत १० भदौमा भोटेकोशी नदीमा आएको भीषण बाढीपछि आयोजनाको प्रशासनतर्फ कार्यरत ४२ वर्षीय घोष सम्पर्कविहीन भएका हुन्। उनी बेपत्ता भएको आज १३ दिन पुगिसकेको छ, तर अहिलेसम्म उनको अवस्था बारे कुनै ठोस जानकारी प्राप्त हुन सकेको छैन।
बाढी आउनुभन्दा एक दिनअघि अर्थात् ९ भदौ साँझ परिवारसँग भएको कुराकानी नै घोषसँगको अन्तिम सम्पर्क बनेको परिवारले जनाएको छ। त्यसयता उनको मोबाइलमा पटक–पटक फोन गरिए पनि सम्पर्क हुन सकेको छैन। दिन बित्दै जाँदा परिवारको बेचैनी झनै बढिरहेको छ।
घोषका परिवारका सदस्यहरू दिनरात उनको मोबाइलमा फोन गरिरहेका छन् तर लागेको छैन। कहिलेकाहीँ फोनको घण्टी बज्ला र उताबाट रामप्रसादको आवाज सुनिएला भन्ने आशामा उनीहरू मोबाइल हातमै लिएर बस्ने गरेका छन्। तर अहिलेसम्म प्रत्येक प्रयास निराशामै टुंगिएको छ।
‘फोन उठ्छ कि’ भन्ने आशामा गरिने प्रत्येक कल र फोन नलागेपछि छाउने मौनताले परिवारलाई झन् पीडित बनाइरहेको छ।
बाढीले आयोजनास्थल तथा आसपासका क्षेत्रमा ठूलो क्षति पुर्याएका कारण त्यहाँको भौगोलिक अवस्था कठिन बनेको छ। जोखिमपूर्ण भूगोल तथा उद्धार र खोजी कार्यमा देखिएका चुनौतीका कारण घोषको अवस्था पत्ता लगाउन कठिन भइरहेको बताइएको छ।
घोषको घर छेउ भारतको झारखण्डस्थित राँची नजिकैको गाउँमा रहेको प्रहरी चौकीका सब–इन्स्पेक्टर मनिषकुमार श्रीवास्तवले पनि घोष बाढीपछि सम्पर्कविहीन रहेको र उसको अवस्था बारे पटक पटक ह्वाट्सएपमा कल गरेर सोधबुझ गरिरहेका छन्।
श्रीवास्तवका अनुसार घोषका परिवारसँग ९ भदौ साँझ कुराकानी भएको थियो। त्यसपछि भने उनको कुनै खबर प्राप्त भएको छैन। १३ दिन बितिसक्दा पनि परिवारले आशा मारेको छैन।
प्राकृतिक विपत्तिपछि लामो समयसम्म कुनै खबर नआउँदा परिवारका लागि हरेक दिन एउटा वर्षजस्तै बन्ने गर्छ। घोषको परिवार अहिले त्यही पीडादायी प्रतीक्षामा छ।
परिवारका सदस्यहरूका लागि अहिले बज्ने प्रत्येक फोनको घण्टी रामप्रसाद सकुशल भेटिएको खबर आउने आशा बनेको छ। तर फोन उठ्दा पनि अपेक्षित खबर नआएपछि उनीहरूको बेचैनी झनै गहिरिँदै गएको छ।
परिवारले रामप्रसाद सकुशल भेटिने आशा अझै नछाडेको जनाएको छ। खोजी तथा उद्धारमा संलग्न सुरक्षा निकाय, स्थानीयवासी तथा सम्बन्धित सबै पक्षलाई घोषको खोजीलाई प्राथमिकताका साथ अघि बढाइदिन परिवारले भावपूर्ण अपिल गरेको छ।
घोषको अवस्थाबारे कसैलाई कुनै जानकारी प्राप्त भए परिवार वा सम्बन्धित सुरक्षा निकायलाई तत्काल जानकारी गराइदिन आग्रह गरिएको छ।
