झापाबाट २०.८३० ग्राम खैरो हेरोइन सहित तीन जना पक्राउ
झापा, भदौ २३ गते । झापाबाट लागू औषध खैरो हेरोइनसहित तीन जनालाई प्रहरीले पक्राउ गरेको छ।
लागू औषध नियन्त्रण ब्यूरो शाखा कार्यालय काँकडभिट्टाबाट खटिएको प्रहरी टोलीले भारतबाट लागू औषध खैरो हेरोइन खरिद गरी कोशी प्रदेशका विभिन्न जिल्लामा बिक्री गर्ने गरेको सूचनाका आधारमा उनीहरूलाई पक्राउ गरेको हो।
प्रहरीका अनुसार भदौ २२ गते झापाको मेचीनगर नगरपालिका–६ र कनकाई नगरपालिका–५ बाट उनीहरूलाई पक्राउ गरिएको हो। पक्राउ पर्नेमा अर्जुनधारा नगरपालिका–११ का २१ वर्षीय गोविन्द श्रेष्ठ, बिर्तामोड नगरपालिका–११ का ३० वर्षीय कृष्णबहादुर प्रधान र कनकाई नगरपालिका–४ का ३२ वर्षीय रोशन चौधरी रहेका छन्।
उनीहरूको साथबाट २०.८३० ग्राम खैरो हेरोइन, दुई थान मोबाइल, नेपाली नगद २ हजार ६ सय रुपैयाँ र एक थान साइकल बरामद गरिएको प्रहरीले जनाएको छ।
पक्राउ परेका गोविन्द श्रेष्ठ र कृष्णबहादुर प्रधानलाई आवश्यक अनुसन्धानका लागि इलाका प्रहरी कार्यालय काँकडभिट्टा तथा रोशन चौधरीलाई इलाका प्रहरी कार्यालय अनारमनी, झापा पठाइएको लागू औषध नियन्त्रण ब्यूरोले जनाएको छ।
घटनाबारे थप अनुसन्धान भइरहेको प्रहरीले जनाएको छ।
