झापाको दमकमा चोरीका सुनका गहना सहित १९ वर्षीय युवक पक्राउ
झापा । झापाको दमकमा चोरीका सुनका गहनासहित एक जना युवक पक्राउ परेका छन्।
पक्राउ पर्नेमा पाँचथर मिक्लाजुङ गाउँपालिका–४ रवि घर भई हाल दमक नगरपालिका–५ मा डेरा गरी बस्ने १९ वर्षीय दीपक राई रहेका छन्।
प्रहरीका अनुसार दमक–२ की ३१ वर्षीया मनिषा तामाङको घरमा कोही नभएको मौका छोपी दराज फुटाएर सुनको सिक्री, बच्चाको सुनको चुरा, सुनको पिंजडा, तिलहरी र नगद २० हजार रुपैयाँ चोरी भएको थियो।
घटनाबारे जानकारी पाएपछि इलाका प्रहरी कार्यालय दमकबाट खटिएको टोलीले सीसीटीभी फुटेजका आधारमा खोजी गर्ने क्रममा दमक–५ गुम्बा चोकबाट राईलाई पक्राउ गरेको हो।
उनको साथबाट नगद ७९ हजार रुपैयाँ, चाँदीको पाउजु, सुनको पिंजडा २ थान र सुनको श्रीबन्दी १ थान बरामद भएको प्रहरीले जनाएको छ। घटनाबारे थप अनुसन्धान भइरहेको छ।
