इलाममा बोलेरो दुर्घटना, पाँच जना घाइते
इलाम । इलामको माङ्सेबुङ गाउँपालिका–२ दहगाउँस्थित आरुबोटे–दमक भित्री कच्ची सडकखण्डमा जिप दुर्घटना हुँदा पाँच जना घाइते भएका छन्। घाइतेमध्ये एक बालिकाको अवस्था गम्भीर रहेको प्रहरीले जनाएको छ।
बुधबार बिहान करिब १०ः३० बजे आरुबोटेबाट दमकतर्फ जाँदै गरेको मे.१ ज ३३४७ नम्बरको जिप अनियन्त्रित भई सडकबाट करिब ५० मिटर तल खसेर दुर्घटना भएको हो।
दुर्घटनाको जानकारी दिउँसो १२ः१० बजे प्रहरी चौकी इभाङमा प्राप्त भएपछि प्रहरी टोली घटनास्थलमा पुगेको थियो। घाइते सबैलाई उपचारका लागि दमकस्थित लाइफलाइन अस्पताल पठाइएको थियो।
दुर्घटनामा जिप चालक पाँचथरको मिक्लाजुङ गाउँपालिका–३ का ३६ वर्षीय खेमराज मगर, मिक्लाजुङ–५ की ४३ वर्षीया मनकुमारी लावती र पाँचथर तुम्बेवा गाउँपालिका–१ का २१ वर्षीय जनक तामाङको अवस्था सामान्य रहेको छ।
मनकुमारीकी १२ वर्षीया छोरी लाम्सिमी लावतीको अवस्था गम्भीर रहेकाले थप उपचारका लागि विराटनगरस्थित न्युरो अस्पताल पठाइएको प्रहरीले जनाएको छ। मनकुमारीकै २३ महिनाका छोरा लाम्सेमा लावतीको अवस्था मध्यम रहेको छ।
जिप घटनास्थलमै रहेको र सडकमा कुनै अवरोध नरहेको प्रहरीले जनाएको छ। घटनास्थल प्रहरी चौकी इभाङबाट करिब १८ किलोमिटर पश्चिम–उत्तरमा पर्छ। दुर्घटनाबारे थप अनुसन्धान भइरहेको प्रहरीले जनाएको छ।
