झापाको बिर्तामोडमा युवतीलाई बाँधेर पेट्रोल छर्की आगो लगाउन खोजेको आरोपमा एक जना पक्राउ
झापा । झापाको बिर्तामोडमा एक युवतीलाई हातखुट्टा र घाँटी बाँधेर शरीरमा पेट्रोल छर्की आगो लगाउन खोजेको आरोपमा प्रहरीले एक जनालाई पक्राउ गरेको छ।
प्रहरीका अनुसार असोज १२ गते राति करिब १०ः३० बजे इलामको रोङ गाउँपालिका–३ घर भई हाल बिर्तामोड नगरपालिका–५ मा डेरामा बस्दै आएकी २२ वर्षीया रविना मगरको कोठामा भारतको किशनगञ्ज जिल्ला, कदमगाछी थाना पछाड कट्टा ग्राम पञ्चायत घर भएका ४२ वर्षीय दिलिप चन्द्र राय प्रवेश गरेका थिए।
रायले मादक पदार्थ सेवन गरी पेट्रोलसमेत लिएर कोठामा प्रवेश गरेको र तन्ना च्यातेर मगरको हातखुट्टा तथा घाँटी बाँधी शरीरमा पेट्रोल छर्केर आगो लगाउन खोजेको प्रहरीको भनाइ छ।
घटनाको सूचना पाएपछि प्रहरी टोली तत्काल घटनास्थलमा पुगेर रायलाई नियन्त्रणमा लिएको थियो। घटनामा घाइते भएकी मगरलाई उपचारका लागि मनमोहन अस्पताल, बिर्तामोड लगिएको छ।
पक्राउ परेका रायविरुद्ध घटनाबारे थप अनुसन्धान भइरहेको प्रहरीले जनाएको छ।
