जबरजस्ती करणीको आरोपमा फरार प्रतिवादी सिराहाबाट पक्राउ
विराटनगर । जबरजस्ती करणी गरी फरार रहेको आरोपमा प्रहरीले एक जनालाई सिराहाबाट पक्राउ गरेको छ।
जिल्ला प्रहरी कार्यालय मोरङका अनुसार पक्राउ पर्नेमा सिराहाको लक्ष्मीपुर पतारी गाउँपालिका–४ घर भई हाल विराटनगर महानगरपालिका–४ इक्राही टोलस्थित ससुराली घरमा बस्दै आएका ३४ वर्षीय राकेश कुमार यादव रहेका छन्।
प्रहरीका अनुसार यादवले छिमेकी २१ वर्षीया अविवाहित महिलालाई ललाइफकाइ तथा धाकधम्की दिई जबरजस्ती करणी गरेको र त्यसबाट महिला गर्भवती भएको आरोप छ। पीडित महिलाले बच्चा जन्माएपछि यादवविरुद्ध २०८३ भदौ १८ गते जिल्ला प्रहरी कार्यालय मोरङमा किटानी जाहेरी दिएकी थिइन्।
जाहेरीपछि फरार रहेका यादवको खोजी गर्ने क्रममा जिल्ला प्रहरी कार्यालय सिराहाको सहयोगमा कात्तिक ११ गते आफ्नै घरमा लुकिछिपी बसेको अवस्थामा पक्राउ गरिएको प्रहरीले जनाएको छ।
पक्राउ परेका यादवलाई मोरङ ल्याई मोरङ जिल्ला अदालतबाट जबरजस्ती करणीसम्बन्धी कसुरमा पाँच दिनको म्याद थप गरी थप अनुसन्धान भइरहेको जिल्ला प्रहरी कार्यालय मोरङले कात्तिक १२ गते जारी गरेको प्रेस विज्ञप्तिमा उल्लेख छ।
प्रहरीले घटनाबारे थप अनुसन्धान गरिरहेको जनाएको छ।
