नायिका वर्षा राउतका पिता मेयरमा उठेको बर्दिवासको पछिल्लो मतपरिणाम सार्वजनिक
बर्दिवास, ४ असोज । नायिका वर्षा राउतका पिता मेयर उम्मेदवार रहेको महोत्तरीको बर्दिवास नगरपालिकाको पछिल्लो मतपरिणाम सार्वजनिक भएको छ ।
यहाँको १४ वडामध्ये ३ मतगणना भइसक्दा मेयरमा नेपाली कांग्रेसले अग्रता लिइरहेको छ । पछिल्लो परिणामअनुसार कांग्रेसका प्रल्हादकुमार क्षेत्रीले २१८१ मत पाएका छन् ।
दोस्रो स्थानमा १२८९ मतसहित माओवादी केन्द्र विदुरकुमार कार्की रहेका छन् । एमालेबाट उम्मेदवार नायिका वर्षा राउतका पिता सुरेशबहादुर राउत भने ११६८ मतसहित तेस्रो स्थानमा छन् । यो परिणामले नेता कार्यकर्तामा केही निराशा देखिएको छ । यद्यपी अझै ११ वडा बाँकी रहेको र एमालेको पकड क्षेत्रमा मत गन्नै बाँकी रहेकाले आत्तिनुपर्ने अवस्था नरहेको बताउँछन् मेयरका उम्मेदवार सुरेश राउत ।
बर्दिवासमा १, २ र १४ नम्बर वडाको अन्तिम परिणाम आइसकेको र अहिले ३, १३ र १२ नम्बर वडाको मतगणना भइरहेको मुख्य निर्वाचन अधिकृत मणिराम न्यौपानेले जानकारी दिए ।
