अब नेपालमा एउटा मात्र कम्युनिष्ट पार्टी हुने छ : योगेश भट्टराई
माओबादी लाइ एमालेमा मिलाउने अन्तिम लक्ष
काठमाडौं, असोज १६ । नेकपा एमालेका सचिव एवम प्रचार विभाग प्रमुख योगेश भट्टराईले नेकपा माओवादीसँग चुनाबी तालमेलका लागि शीर्ष तहमा गम्भीर छलफल भइरहेको बताएका छन ।
एभरेस्ट दैनिकका अनुसार नेता भट्टराईले प्रदेश र केन्द्रको निर्वाचनमा माओवादीसंग तालमेल गरेर जाने पार्टीले निर्णय गरेको छ । ‘तत्कालका लागि सबै वामपन्थी पार्टीसँग चुनावी तालमेल गर्ने हाम्रो तयारी छ । दीर्घकालमा नेपालमा एउटै कम्युनिष्ट पार्टी बनाउने हाम्रो मिसन हो,’ उनले भने ।
तालमेलको आधार के हो भन्ने प्रश्नमा नेता भट्टराईले भने, वामपन्थी शक्तिलाई आगामी मंसिरमा हुने प्रतिनिधिसभा र प्रदेशसभामा धेरै स्थानमा विजयी गराउने मुख्य आधार राखेर माओवादीसँग छलफल भैरहेको उनको भनाइ थियो । नेपालमा एउटा शक्तिशाली एकीकृत कम्युनिष्ट पार्टी बनाउने उद्देश्य राखेर सबै बाम शक्तिबीच तालमेलको निर्णय गरेको उनको जिकिर थियो ।
माओवादी नेता वर्षामान पुन ‘अनन्त’ले आइतबार रोल्पामा एमालेसँग चुनाबी तालमेल र पार्टी एकताका बारेमा राखेको विचारलाई नेता भट्टराईले समयको माग अनुसारको उचित बताए ।
पार्टी एकताको बिषयमा एमाले र माओवादीबीच छलफल चलेको सन्दर्भमा नेता भट्टराइले सैद्धान्तिकरूपमा माओवादी र एमाले दुबैले नेपालमा एउटा मात्र कम्यूनिष्ट पार्टी निर्माण गर्ने मान्यतामा रहेकोले त्यो सम्भव भएको बताए ।
‘नेकपा एमालेको महाधिवेशनले अब नेपालमा एउटा मात्रै कम्युनिष्ट पार्टी बनाउनुपर्छ भनि पारित गरेको छ,’ एमाले सचिव भट्टराईले भने, ‘नेकपा माओवादीले पनि त्यस्तै निर्णय गरिसकेको छ । त्यसैले अब हाम्रो मिसन भनेका सबै कम्युनिष्ट पार्टी मिलाएर शक्तिशाली एकीकृत कम्युनिष्ट पार्टी बनाउने हो ।’
अहिलेको समयको माग देशमा दुईवटा विचार मात्रै भएको पार्टीको आवश्यकता रहेको उनको भनाइ थियो । ‘अहिलेको समयको माग ध्रुविकरणको हो, एउटा कम्युनिष्ट र अर्को पूजीवादी ।’ उनले भने, ‘त्यसैका लागि हाम्रो प्रयास भनेको पहिला आगामी चुनाबमा वामपन्थी पार्टीसँग तालमेल गरेर बढी वामपन्थी शक्तिलाई निर्वाचनमा जिताउने र त्यसपछि पार्टी एकताका लागि प्रक्रिया अगाडि बढाउने हुनेछ ।’
यसअघि आइतबार नेकपा माओवादी केन्द्रका नेता बर्षमान पुनले एमालेसँग पार्टी एकता हुन सक्ने बताएका थिए ।
पछिल्लो डेढ वर्षयता एमाले र माओवादीबीच माथीदेखि तलसम्म कटुता बढ़ेको सन्दर्भमा तालमेल र एकताको बहसले नयाँ चासो उत्पन्न गरेको छ । माओवादीभित्र अहिले कांग्रेससँगको गठबन्धनलाई निरन्तरता दिनुपर्ने बलियो मत देखिन्छ ।
