माओवादी केन्द्र सरकारमै बस्ने कि छाड्ने ? आज निर्णय गर्दै
काठमाडौं । सत्ता साझेदार नेकपा माओवादी केन्द्रले सरकारमा रहिरहने वा राजीनामा दिने विषयमा आज निर्णय गर्ने भएको छ । निर्णय लिनको लागि माओवादी केन्द्रका शीर्ष नेताहरूको बैठक बस्दै छ ।
पार्टीबाट प्रतिनिधित्व गर्ने मन्त्री र पार्टीका नेताहरूको सुझाबपछि अध्यक्ष प्रचण्डले पार्टीको धारणा सार्वजनिक गर्ने उनको सचिवालयले जनाएको छ । माओवादी मन्त्रीहरूले नैतिक प्रश्न उठ्ने देखिएमा शनिबार वा आइतबार बिहानसम्म राजीनामा दिने मनस्थिति बनाएका छन् ।
माओवादीले सरकारमा भए वा नभए पनि निर्वाचन सार्न नमिल्ने पहिलो सर्त बनाएको छ । निर्वाचन सार्दा वाम गठबन्धनमा समस्या आउनुका साथै संवैधानिक संकट आउन सक्ने भएकाले सरकार माओवादीको कम प्राथमिकतामा परेको छ ।
निर्वाचन आचारसंहिताविपरित प्रधानमन्त्री शेरबहादुर देउवाले शुक्रबार मन्त्रिपरिषद बिस्तार गरेपछि माओवादीलाई दबाव बढेको छ । कांग्रेससँग सत्ता साझेदारी गरेको माओवादीले एमालेसँग गठबन्धन गरेपछि कांग्रेस-माओवादी सम्बन्ध चिसिएको छ ।
