सुतेकै ठाउँमा १३ वर्षीया किशोरीलाई चितुवाले खायो
अछाम, असार २१ । अछाममा गएराति घरैमा सुतिरहेको अवस्थामा १३ वर्षीया किशोरीलाई चितुवाले आक्रमण गरेको छ । मेल्लेख गाउँपालिका-८ हत्तिकोटको डुग्री गाउँका गोपाल भुलकी छोरी पवन भुललाई चितुवाले आक्रमण गरेर ज्यान लिएको हो । इलाका प्रहरी कार्यालय साफेबगरले दिएको जानकारी अनुसार राति आमासँगै ढोका नजिकै सुतेको बेला चितुवाले आक्रमण गरेको हो ।
ती किशोरीलार्इ चितुवाले घाँटीमा समातेर करिब एक सय मिटर पर पुर्याएको कान्तिपुर दैनिकमा खबर छ ।
प्रहरीका अनुसार किशोरीको शव घाँटी पुरै खाएको अवस्थामा भेटिएको । आमाले होहल्ला गर्दा चितुवा भागेको प्रहरीले जनाएको छ । गर्मीयाममा ढोका खुल्लै राखेर सुतेका बेला उक्त घटना भएको हो ।
किशोरीको शव पोष्टमार्टमका लागि जिल्ला अस्पताल अछाममा राखिएको छ । अछामका गाउँमा विगतको समयमा पनि चितुवाले थुप्रै गाउँलेलार्इ शिकार बनाइसकेको छ।
