कार्यालय प्रमुख नहुँदा ४ महिनादेखि कार्यालयको सेवा ठप्प
धनकुटा खबर । तेह्रथुम, १२ साउन । तेह्रथुमको आठराई गाउँपालिकाको केन्द्र सक्रान्तिबजारमा रहेको इलाका प्रशासन कार्यालयमा कार्यालय प्रमुख नहुँदा चार महिनादेखि कार्यालयको सेवा ठप्प भएको छ ।
गतवर्ष यस क्षेत्रका बासिन्दालाई लक्षित गरी इलाका प्रशासन कार्यालय स्थापना भएपनि डेढ वर्ष नबित्दै कार्यालयको सेवा ठप्प हुँदा स्थानीयबासी निराश भएका छन् ।
कार्यालय प्रमुख नहुँदा कार्यालयबाट प्रदान हुने नागरिकता, नागरिकताको प्रतिलिपि, राहदानी सिफारिस, जाति तथा नाता प्रमाणित लगायत प्रशासनिक सेवाहरु ठप्प भएको हो ।
लामो समयसम्म कार्यालय प्रमुखको पद रिक्त हुँदा आठराईबासीले सेवा लिन सदरमुकाम म्याङलुङ नै पुग्नुपर्ने बाध्यता रहेको छ ।
कार्यालयबाट आठराई गाउँपालिकाका सक्रान्तिबजार, खाम्लालु्ङ, ह्वाकु, इवा, छातेढुंगा, चुहानडाँडा, थोक्लुङ गाउँका बासिन्दाले सेवा लिदै आएका थिए ।
