जिप दुर्घटनामा तीनको मृत्यु, १६ घाइते
डोटी, ८ वैशाख । डोटीको शिखर नगरपालिका–३ आली गाउँमा आज दिउँसो यात्रु बोकेको जिप दुर्घटना हुँदा तीनजनाको घटनास्थलमै मृत्यु भएको छ । घटनामा परी अन्य १६ जना घाइते भएका छन् ।
शिखर नगरपालिका आली गाउँमा शनिबार दिउँसो भएको दुर्घटना भएको शैलेश्वरी यातायातको ग १ ज ५२७५ नम्बरको जीप । दिपायलबाट जोरागाउँका लागि हिँडेको उक्त जीप दुर्घटनामा तीन जनाको मृत्यू भएको छ भने १६ जना घाईते भएका छन् । तस्वीर: केशबचन्द्र महरा, रासस, डोटी
दिपायलबाट जोरागाउँतर्फ जाँदै गरेको शैलेश्वरी यातायातको ग१ज ५२७५ नंको जिप गाउँ नजिकै खोलामा दुर्घटनामा परेको हो ।
दुर्घटनामा परी मृत्यु हुनेमा शिखर नगरपालिका–३ जोरगाउँकै ४० वर्षीया खिन्तुरी भुल, ३२ वर्षीया कटी सार्की र १४ वर्षीय बालक सुरज भुलको मृत्यु भएको इलाका प्रहरी कार्यालय दिपायलले जनाएको छ ।
शिखर नगरपालिका–३ आली गाउँमा दुर्घटना ग्रस्त जीपका घाइते यात्रुहरुको दिपायलस्थित शैलेश्वरी अस्पतालमा उपचार हुँदै । शैलेश्वरी यातायातको ग १ ज ५२७५ नम्बरको जीप आली गाउँमा दुर्घटना भएको हो । तस्वीर: केशबचन्द्र महरा, रासस, डोटी
प्रहरी र स्थानीयवासी मिलेर घाइतेहरुको उद्धार जारी रहेको इलाका प्रहरी कार्यालय दिपायलका प्रमुख प्रहरी नायब निरीक्षक दिलबहादुर कुँवरले जानकारी दिनुभयो ।
