भोलि संविधान दिवसमा दिपावली होइन, ‘ब्ल्याक आउट’ गर्ने : राजेन्द्र महतो
काठमाडौं, २ असोज । राजपा नेपालका अध्यक्ष मण्डलका सदस्य राजेन्द्र महतोले भोलि आफ्नो पार्टीले संविधान दिवसलाई ‘ब्ल्याक आउट’ गर्ने बताएका छन् । उनले संविधान दिवसका दिन ७० प्रतिशत जनताले ब्ल्याक आउट गर्ने चेतावनी दिए ।
प्रतिनिधिसभाको चालु अधिवेशनको अन्तिम दिन बोल्दै महतोले संविधान बनेको ४ वर्ष भइसक्दा पनि सबै जनताले उत्साहपूर्वक संविधान दिवस मनाउने अवस्था नआएको टिप्पणी गरे ।
महतोले आक्रोशित हुँदै भने,’भोलि दिपावली होइन, ब्ल्याक आउट गर्ने हो, यो देशका मधेसी, जनजाती, थारू, दलितले ब्ल्याक आउट गर्छ । देशका ७० प्रतिशत जनताले संविधान दिवस मनाउन चाहिरहेको छैन । सबैलाई राष्ट्रघाति घोषणा गर्दिने ?’
