साउदी अरेबियामा नेपालीले यसरी लगाए सामुहिक भाइटीका
दमाम,साउदी । साउदी अरेबियाको पूर्वी क्षेत्रमा नोभेम्बर १ तारीख शुक्रबार विविध रुपले भाइटिका सकिएको छ । रोजगारीका लागि साउदी आइपुगेका नेपालीहरुले शुक्रबार दिदीबहिनीको समूहको आयोजनामा सामुहिक भाइटिका लगाएको थियोे । साउदीमा नेपालमाभन्दा तीन दिनपछि कार्तिक १५ गते भाइटिका मनाइएको हो ।
दमामस्थित रोज रेष्टुरेण्टको अडिटोरियम हलमा आयोजना गरिएको भाइटिका कार्यक्रमको व्यवस्थापन तमु धि, दिदीबहिनी, किराँत राई यायोक्खा लगायतले गरेको थियो ।
भाइटीका चेली र माईतिको सम्बन्ध प्रगाढ, असीम माया आत्मियता, सामाजिक सद्भाव र सम्बन्ध शुद्धृढ बनाउने चाड भएकोले कार्यक्रममा औपचारिकरुपमा निमन्त्रणा नगरिएको दिदीबहिनी समूहकी अध्यक्ष तुलसी गुरुङले बताइन् ।
बिहान् ८.०० बजेबाट सुरु भएको कार्यक्रममा भाइटिका सकेपछि देउसी खेलेका थिए । समारोहमा दाजुभाइले टीका ग्रहण गरेपश्चात् दिदीबहिनीले पुष्प गुच्छाका मालासँगै दूध, दहि, सेल रोटी, तरकारी, अचार लगायतका परिकारहरू खुवाएको थियो ।कार्यक्रममा पाँच चरण गरी झण्डै ३ दर्जनभन्दा बढीले भाइटीका लगाएका थिए ।
कार्तिक शुल्क द्वितीयका दिन मनाइने चाड यमपञ्चकको पाचौ दिन भाइटिका दिदी बहिनीले दाजु वा भाइलाई श्रदा, आस्था र निष्ठाका साथ दीर्घायु आरोग्य र ऐश्वर्य प्राप्तिको कामना गर्दै सप्तरङ्गी टीका र माला लगाई मिष्ठान्न भोजन खुवाइ मनाइने प्रचलन छ ।
त्यसैगरी दाजुभाइले दिदी वा बहिनीहरुलाई पनि टीका लगाई उपहार स्वरुप दक्षिणा गर्ने गरिञ्छ । यसरी दिदीबहिनीलाई पूजा गर्नाले अखण्ड सौभाग्य र ऐश्वर्य प्राप्त हुने शास्त्रीय शाब्दिक मान्यता छ ।
