प्रज्ञामा पुस्तक मेला सुरु
काठमाडौँ । नेपाल प्रज्ञा–प्रतिष्ठानमा आज मङ्सिर १ गते आइतबारदेखि पुस्तक मेला सुरु भएको छ । कुलपति गङ्गाप्रसाद उप्रेतीले मेलाको उद्घाटन गर्नुभयो ।
कुलपतिले ज्ञानको केन्द्र प्रज्ञा–प्रतिष्ठानबाट प्रकाशित भाषा एवम् वाङ्मयका विभिन्न पुस्तकहरू उपलब्ध यो मेलाबाट पाठकवर्गले असीमित लाभ लिन सक्ने बताउनुभयो ।
१५ दिनसम्म चल्ने मेलामा पछिल्लो ६ महिनाभित्र प्रज्ञा–प्रतिष्ठानबाट प्रकाशित ८० भन्दा बढी नयाँ पुस्तकहरू उपलब्ध छन् । मेलामा पुस्तक खरिद गर्दा १० देखि ६० प्रतिशतसम्म छुटको व्यवस्था रहेको सदस्य सचिव प्रा. जगत्प्रसाद उपाध्यायले बताउनुभयो ।
