स्वास्थ्य मापदण्डका विषयमा समुदाय सचेतना कार्यक्रमसहित ताराखोला गाउँपालिकालाई स्वास्थ्य सामग्री प्रदान
लेवा, कोरोना महामारीमा अपनाउनुपर्ने स्वास्थ्य मापदण्डका विषयमा समुदाय सचेतना कार्यक्रमसहित ताराखोला गाउँपालिकालाई स्वास्थ्य सामग्री प्रदान गरिएको छ । पत्रकार महासङ्घ बागलुङले समुदायस्तरमा पुगेर स्वास्थ्य सचेतनासहित गाउँपालिकालाई स्वास्थ्य सामग्री प्रदान गरेको हो ।
महासङ्घले जिल्लाका दुई स्थानीय तहमा स्वास्थ्य सचेतना र स्वास्थ्य सामग्री प्रदान गर्ने कार्यक्रम बनाएको थियो । मङ्गलबार उक्त गाउँपालिका पुगेर नागरिक तहमा स्वास्थ्यका मापदण्ड अपनाउन र कोरोनाबाट बच्न आग्रह गरिएको अध्यक्ष नरेश कँडेलले बताउनुभयो ।
महासङ्घले काठेखोला गाउँपालिकामा पनि कार्यक्रम गर्ने कँडेलले जानकारी दिनुभयो । महासङ्घका पदाधिकारीसहित स्वास्थ्यकर्मीको समूहले सचेतना तथा स्वास्थ्य सामग्री हस्तान्तरणका गतिविधि गर्नेछ । महासङ्घले गलकोट नगरपालिकाका लागि भने केही मास्क र स्यानिटाइजर प्रदान गरेको छ ।
ताराखोला पुगेको पत्रकारको समूहले विभिन्न व्यक्ति तथा संस्थासँग सहकार्य गरेर एक थान अक्सिजन कन्सन्टे«टर, दुई थान डिजिटल थर्मल गन, पाँच थान अक्सिमिटर र तीन हजार थान मास्क हस्तान्तरण गरेको थियो । स्वास्थ्य सामग्री ग्रहण गर्दै गाउँपालिकाका प्रमुख प्रशासकीय अधिकृत रामप्रसाद शर्माले भन्नुभयो, “सचेतना र स्वास्थ्यका मापदण्ड अपनाउँदै सुरक्षित रहन अझै आवश्यक छ, सहयोगले हामीलाई साथ दिनेछ ।”
गाउँपालिकाले अस्थायी कोभिड अस्पताल निर्माण गरेको छ । स्वास्थ्य शाखा र अस्पतालमा प्रयोग गर्नेगरी सामग्री हस्तान्तरण गरिएको उपाध्यक्ष नवीन शिशिर विकले बताउनुभयो । महासङ्घले काठेखोलासमेत सोही परिणामका स्वास्थ्य सामग्री प्रदान गरिने उहाँले जानकारी दिनुभयो । आफ्नै भवनमा पत्रकारका लागि आइसोलेशन कक्ष निर्माण गरेको महासङ्घले विभिन्न सङ्घसंस्थासँगको समन्वयमा स्थानीय तहलाई सहयोगसमेत गर्दै आएको छ ।
