दशैंपछिबाट ‘गोर्खा वारियर–२’ को छायाँकन सुरु
काठमाडौं, १७ भदौ । ‘गोर्खा वारियर–२’को बाँकी छायांकन दशैं पछिबाट बेलायतदेखि सुरु हुने भएको छ । यो चलचित्रको छायाँकन कोभिड–१९ र विभिन्न प्राविधिक कारणले यस अघि रोकिएको थियो । यो चलचित्रको अब बाँकी छायाँकन आगामी–१९ अक्टुबरदेखि सुरु हुने यसका निर्माता निर्देशक मिलन चाम्सले बताएका छन् ।
बेलायतबाट नेपाल फर्किएका निर्देशक चाम्सले भने,‘अब बेलायत, भारत लगायतका देशमा अबको बाँकी छायाँकन सम्पन्न गर्दैछु । त्यसको लागि आबस्यक सबै कुरा मिलाएर नेपाल फर्किएको हुँ ।’
यो चलचित्रको छायाँकनको लागि लण्डन तथा भारतदेखि ल्याउनुपर्ने केहि प्राविधिक सामाग्री आगामी २ हप्ताभित्रै नेपाल आइपुग्ने र त्यसपछि छायांकनको तयारीमा जुट्ने पनि उनले बताएका छन् ।
चलचित्र गोर्खा वारियरको छायांकन गर्न केही ढिला हुने भएकाले आफुले गोर्खा वारियर–२ छायांकन सुरु गरेको निर्देशक चाम्सले बताए । अब सिनेमा हलमा पनि गोर्खा वारियर २ रिलिज भएपछि मात्र गोर्खा वारियरको निर्माण सुरु गर्ने पनि उनले बताएका छन् ।
केहि महिनाअघि काठमाडौंमा एक समारोहबीच साहसिक गोर्खा सैनिकप्रति बिगुल फुकेर सम्मान गर्दै चलचित्र गोर्खा वारियर–२ को निर्माण घोषणा गरिएको थियो । त्यसपछि सोलुखुम्बु सहित नेपालका केही स्थानमा यो चलचित्रको छायाँकन गरिएको थियो ।
लन्डन सिनेआई प्रोडक्सनको प्रस्तुति र चाम्स इन्टरटेनमेन्टको सहकार्यमा निर्माण हुने चलचित्रमा सहनिर्माताको रुपमा सुरेश राई र पूर्ण लिम्बू छन् । चलचित्र नेपालसहित मलेसिया र बेलायतमा छायांकन गरिनेछ ।
गोर्खा वारियर २ मा रेविका गुरुङ, विजय लामा, रियर राई, भुवन सिंह राई, शिशिर बाङ्देल, बुद्धि तामाङ, कविता आले, बिरूप घले, सारा राई, मनोज केसी लगायतका कलाकारको अभिनय रहने छ । रितेस चाम्सले नवनायकका रूपमा यो चलचित्रबाट डेब्यु गर्दै छन् ।
गोर्खा सैनिकका नभनिएका हजारौं कथामध्ये एउटा वास्तविक कथालाई चलचित्रमा उतार्न लागिएको उनको भनाई छ ।
यो चलचित्रमा शैलेन्द्र खनाल ‘शरद’को गीत, एलिस कार्कीको संगीत, राजेशपायल राईको गायन, मिलन चाम्स र गिरिराज घिमिरेको लेखन, अर्जुन बीसीको सम्पादन, सुदीप बरालको डीओपी र हिमाल केसीको द्वन्द्व निर्देशन रहनेछ ।
