जिल्ला समन्वय समिति धनकुटाको वार्षिक समिक्षा आजदेखि सुरु
धनकुटा । जिल्ला समन्वय समिति धनकुटाको वार्षिक समिक्षा आजदेखि धनकुटामा सुरु भएको छ ।
आर्थिक वर्ष २०७९/८० मा प्रदेश र संघिय सरकार मार्फत जिल्लाको ७ वटै स्थानिय तहमा सञ्चालित योजना तथा कार्यक्रमको प्रगतिवार समिक्षा गरिने बताईएको छ ।
पूर्व भूमि व्यवस्था,गरिबी निवारण तथा सहकारी मन्त्री राजेन्द्र राईको प्रमुख आतिथ्य तथा जिल्ला समन्वय समितिका प्रमुख निरेन तामाङको अध्यक्षतामा वार्षिक समिक्षा सुरु भएको हो ।
आज सुरुको दिन महालक्ष्मी नगरपालिका र सागुरीगढी गाउँपालिकाले आर्थिक वर्ष २०७९/८० को वार्षिक प्रगति विवरण पेश गरेका छन् । अन्य पालिकाहरुको विवरण भोलि पेश गर्ने तयारी छ ।
कार्यक्रमकै अवसरमा गृह मन्त्रालयमा सरुवा भई जानुभएका प्रमुख जिल्ला अधिकारी थानेश्वर गौतमलाई फेरि भेटौला कार्यक्रमको वीच विदाई गरिएको थियो । कार्यक्रममा प्रदेश सांसद ईन्द्रमणी पराजुली, जिल्ला समन्वय समितिका उपप्रमुख सावित्रा राई सहित सातवटै पालिकाका प्रमुख,उपप्रमुख,अध्यक्ष तथा उपाध्यक्षहरुको उपस्थिति रहको छ ।
