धनकुटामा यसरी मनाइदै सोनाम ल्होसार
धनकुटा । आज तामाङ समुदायले हर्षोल्लासका साथ सोनाम ल्होसार पर्व मनाउँदै छन् । मञ्जुश्री सम्वत् २८६० औं डुक ल्हो सिं खाम सोनाम ल्होछार, माघ शुक्ल प्रतिपदाको दिन आज उनिहरुले कूल पूजाआराधना दानदक्षिणा, ढोगभेट, नाचगान सहित एकापसमा शुभकामना आदानप्रदान गरी यो पर्व मनाउने गर्दछन् ।
यही अवसरमा धनकुटाको हिलेमा भव्य साँस्कृतीक तथा सांगितीक कार्यक्रमको आयोजना गरिने भएको छ । ल्होसार समितीको आयोजनामा हुन लागेको कार्यक्रमको सम्पूर्ण तयारी पूरा भएको छ । हिले तोङ्वा चोकमा हुने कार्यक्रममा राष्ट्रिय कलाकार कुन्ति मोक्तान सहित स्थानिय कलाकारहरुको बेजोड सांगितीक प्रस्तुती रहने आयोजकले जनाएको छ ।
कार्यक्रममा डम्फु टोलीबाट तामाङ सेलो प्रस्तुत गरिने र तामाङ समूदायको भेषभुषामा आधारित फेशन सो समेत गरिने अयोजक समितीका सन्तोष तितुङले बताउनु भएको छ । फेशन सो वच्चा र ठूला दुई समूूहको हुने तितुङले बताउनुु भयो । फेशन सो का लागि मिस तामाङ पूर्वाञ्चलका विजेता प्रजिता तामाङले प्रशिक्षण दिनुभएको थियो ।
कार्यक्रम दिउँसो १ बजेदेखी हुने आयोजकले जनाएको छ ।
