धनकुटामा ट्रक र दुई मोटरसाइकल ठोक्किँदा एक महिलाको मृत्यु, दुई जना घाइते
धनकुटा — धनकुटा नगरपालिका–१ सुकेपोखरीस्थित कोशी लोकमार्गमा ट्रक र दुईवटा मोटरसाइकल एकआपसमा ठोक्किँदा एक महिलाको मृत्यु भएको छ भने दुई जना घाइते भएका छन्।
बिहीबार (कात्तिक १९) साँझ करिब ५ बजे हिलेबाट धनकुटातर्फ आउँदै गरेको प्र.नं. १–०२–००२ ख ०४७४ नम्बरको ट्रकलाई सोही दिशाबाट आउँदै गरेको को १० प ९६८ नम्बरको मोटरसाइकलले ओभरटेक गर्ने क्रममा ठक्कर दिँदा दुर्घटना भएको जिल्ला प्रहरी कार्यालय धनकुटाले जनाएको छ।
दुर्घटनापछि विपरीत दिशाबाट आउँदै गरेको को ३८ प ३०६८ नम्बरको अर्को मोटरसाइकलसमेत दुर्घटनामा परेको थियो।
दुर्घटनामा को १० प ९६८ नम्बरको मोटरसाइकलमा सवार धनकुटा नगरपालिका–१ निगालेकी करिब ५०/५२ वर्षीया ठोमा देवी ठकुरीको घटनास्थलमै मृत्यु भएको प्रहरीले जनाएको छ।
सोही मोटरसाइकलका चालक धनकुटा नगरपालिका–३ निगालेका करिब ५३ वर्षीय गुणराज ठकुरी गम्भीर घाइते भएका छन्। उनलाई उद्धार गरी जिल्ला अस्पताल धनकुटा पठाइएको छ।
त्यस्तै, अर्को मोटरसाइकलका चालक मोरङको विराटनगर महानगरपालिका–१ निवासी २० वर्षीय रोशन तामाङ सामान्य घाइते भएका छन्। उनको पनि जिल्ला अस्पताल धनकुटामा उपचार भइरहेको छ।
घटनालगत्तै जिल्ला प्रहरी कार्यालय धनकुटाका प्रहरी उपरीक्षक नारायण रञ्जितकारको कमान्डमा २५ जनाको प्रहरी टोली घटनास्थल पुगेको थियो।
प्रहरीले ट्रक चालक सुनसरीको धरान उपमहानगरपालिका–२० निवासी ३८ वर्षीय चाङबहादुर तामाङ, ट्रक तथा दुवै मोटरसाइकल नियन्त्रणमा लिएको छ। मृतकको शव कानुनी प्रक्रिया पूरा गरी पोस्टमार्टमका लागि जिल्ला अस्पताल धनकुटा पठाइएको छ।
घटनाबारे थप अनुसन्धान भइरहेको जिल्ला प्रहरी कार्यालय धनकुटाले जनाएको छ।
