डिप्रोक्स लघुवित्त वित्तीय संस्था हिले शाखाद्वारा माहुरी पालन तालिम प्रदान
धनकुटा । डिप्रोक्स लघुवित्त वित्तीय संस्था हिले शाखाले आफ्ना सदस्यहरुलाई माहुरी पालन तालिम प्रदान गरेको छ । पाख्रीबास नगरपालिका र धनकुटा नगरपालिकाको विभिन्न केन्द्र समुहका गरि जम्मा ७३ जना सदस्यलाई माहुरी पालन तालिम प्रदान गरेको हो ।
तालिममा सहभागीहरुलाई जिल्ला ज्ञानकेन्द्र धनकुटाका अधिकृत रत्न बहादुर ठाडा मगरले प्रशिक्षण दिनुभएको थियो । प्रशिक्षणका क्रममा अधिकृत मगरले माहुरी पालन सम्बन्धि प्राविधिक कुराहरुको बारेमा जानकारी दिनुका साथै माहुरीको जात, कस्तो हावापानीमा माहुरी पालन व्यवसाय राम्रो हुन्छ ? माहुरीको परम्परागत र आधुनिक घारका विषयमा पनि जानकारी गराउनुभएको थियो ।
माहुरी पालन तालिम डिप्रोक्स लघुवित्त वित्तीय संस्था हिले शाखाका प्रवन्धक सानि सेर्पाको अध्यक्षता तथा पाख्रीबास नगरपालिका वडा नं ४ का वडा अध्यक्ष सन्तोष मान्नधरको प्रमुख आतिथ्यमा सम्पन्न भएको थियो ।
तालिम उद्घाटन कार्यक्रममा स्वागत मन्तव्य वित्तीय संस्थाका कमल खतिवडाले राख्नुभएको थियो । सञ्चालन सिर्जना राईले गर्नु भएको थियो । तालिममा सहभागी टीका गुरुङ र गणेश दाहालले प्रभावकारी मुलुक लागेको बताएका थिए । यस्तै वित्तीय संस्थाको सामाजिक उत्तरदायी कार्यक्रम मार्फत किसानलाई तालिम दिने गरेको प्रदेश प्रमुख अर्जुन पोख्रेलले बताउनुभयो ।
संस्थाले लोन कर्जा मात्र दिने होईन त्यो पैसाबाट कसरी उत्पादन गर्ने र कसरी व्यवसायी बन्ने र पैसा कमाउने माध्यमका विषयमा जानकारी दिने तालिम तथा गोष्टी पनि दिने गरेको बताउनुभयो ।
