पाख्रीवास ८ का ८० घरधुरी किसानलाई लक्षित गरि कुलो निर्माण हुँदै
धनकुटा । साना सिंचाई कार्यक्रम अन्र्तगत धनकुटाको पाख्रीवास नगरपालिका वडा नं ८ का ८० घरधुरी स्थानिय किसानलाई लक्षित गरि कुलो निर्माण गरिने भएको छ । सो वडाको बैकुण्ठे र काबरे क्षेत्रका ८० घरधुरी स्थानिय किसानको ९ सय ६० रोपनी जग्गा क्षेत्रफलमा सिंचाई पुर्याउने लक्षका साथ कुलो निर्माण भईरहेको हो ।
स्वीस सरकार विकास सहयोग ३० प्रतिशत, संघिय, प्रदेश, स्थानिय सरकारको २०–२० प्रतिशत र स्थानिय जनसहभागिता १० प्रतिशत रहने गरि ७९ लाख बढी लागतमा कुलो निर्माण भईरहेको पाख्रीवास नगर प्रमुख ज्ञानबहादुर गुरुङको सचिवालयले जनाएको छ । कुलो निर्माणको काम एक महिना अघिदेखी थालिएको हो । अहिले कुलो निर्माण कार्य तिब्र गतिमा भईरहेको ८ नं वडाध्यक्ष गजेन्द्र राईले बताउनु भएको छ ।
वडाध्यक्ष राईका अनुसार छेङगुवा खोलाको मुहानदेखी पानी ल्याउने गरि १ हजार ८ सय ६४ मिटर लामो कुलो निर्माण भईहेको हो । हाल कुलो निर्माणको काम करिब ४० प्रतिशत बढी भएको उपभोक्ता समितीका अध्यक्ष कपिलमणी सुवेदीले जानकारी दिनुभयो । २०८१ असार २० सम्म निर्माण कार्य पूरा गर्ने सम्झौता भएपनि छिट्टै काम सक्ने सुवेदीले बताउनु भएको छ ।
