पाख्रिबासमा ‘रमाइलो दशैं मेला २०८१ ’ आयोजना हुने
धनकुटा । दशैंको अवसर पारेर धनकुटाको पाख्रिबासमा दशैं मेला आयोजना हुने भएको छ । पाख्रिबास ४ स्थित जालपादेवी माबिको खेल मैदानमा रमाइलो दशैं मेला २०८१ आयोजना हुने भएको हो ।
मेला असोज २५ गते देखि कार्तिक १० गते संचालन हुने आयोजक युथ युनाइटेड, पाख्रिबासका अध्यक्ष गणेश गुरुंगले बताउनु भयो ।
मेलामा दैनिक चर्चित राष्ट्रिय कलाकारहरुको प्रस्तुति रहने छ । मेलामा स्थानिय कला ,संस्कृतिका साथै यहाँको उत्पादन देखि विभिन्न प्रतियोगिता, सांस्कृतिक कार्यक्रम,रोटेपिंग लगायतका मनोरन्जनका लागि राखिने आयोजकले जनाएको छ ।
मेलामा स्थानीय मौलिक उत्पादनलाई प्राथमिकतामा राख्दै विभिन्न स्टलहरु पनि राखिने आयोजकको भनाई छ ।
यसैगरि युथ युनाइटेडको आयोजना र पाख्रीबास नगरपालिकाको सह आयोजनामा आगामी कार्तिक ७ देखि १० गते सम्म चौंथो पाख्रीबास कप फुटबल खेल पनि संचालन हुंदैछ ।
प्रतियेगितामा जम्मा ८ टीमले सहभागिता जनाउने छन् ।
जस अन्तर्गत कार्तिक ७ गते समुह क अन्तर्गत श्री जोरपाटी फुटबल क्लब धनकुटा र पथरी-११ मोरंगका बीच क समूह ख अन्तर्गतका आयोजक पाख्रिबास युथ युनाइटेड र प्रकाशपुर फुटबल क्लब सुनसरीका बीच खेल हुने भएको छ ।
त्यसैगरि कार्तिक ८ गते समूह क अन्तर्गतका अल स्टार क्लब धरान र ब्रदर युनाइटेड फुटबल क्लब सिक्किमका बीच र समूह ख अन्तर्गतका मुनल्याण्ड स्पोर्टिंग क्लब झापा र बिराटनगर स्पोर्ट्स एकेडेमी मोरंगका बीच हुनेछ ।
कार्तिक ९ गते समूहगत चरणबाट छानिएर आउने ४ टीमको प्रतिष्पर्धा हुनेछ भने उपाधिका लागि प्रतियोगिताको अन्तिम खेल कार्तिक १० गते दिउंसो १ बजे हुने आयोजकले जनाएको छ ।
सबै खेलहरु श्री जालपादेबी माबि पाख्रिबासको खेल मैदानमा हुनेछन् ।
