धनकुटाको साँगुरीगढीमा सम्पन्न होली विशेष प्रथम चाँदीबजार साँगीतिक महोत्सवको आय व्यय सार्वजनिक
हिराराज राई,धनकुटा । धनकुटाको साँगुरीगढी-९ स्थित गत चैत्र ११ र १२ गते सम्पन्न भएको होली विषेश प्रथम चाँदीबजार साँगीतिक महोत्सवको आय व्यय सार्वजनिक गरिएको छ ।
सामाजिक सञ्जालमा चर्को आलोचना गरिएपछि आयोजकले ६ महिनापछि हिसाब सार्वजनिक गरेको हो । आयोजक समिति भित्रैबाट हिसाब सार्वजनिक नगरेको आलोचना भएपछि आय ब्यय सार्वजनिक गरिएको हो । आयोजकका अध्यक्ष सन्तोष राईले सार्वजनिक गरिएको आय व्ययमा १० लाख ७ हजार ५४० भएको जनाएको छ ।
त्यसैगरी व्ययतर्फ कार्यक्रम सञ्चालन तथा व्यावस्थापनतर्फ ६ लाख ५५ हजार ८१ रुपैया देखाएको छ । भौतिक पुर्वाधार निर्माणतर्फ ८९ हजार ३४० खर्च विवरण देखाएको छ । विविध खर्च भन्दै ९२ हजार ३५५ रुपैया देखाएको छ । कुल खर्च ८ लाख ३६ हजार ७७६ भएको जनाएको छ ।
प्रथम चाँदी बजार साँगीतिक महोत्सवमा चर्चित हाँस्य कलाकार उमेश राई(फुलन्देको आमा), चर्चित गायिका सुनिता थेगिम, चर्चित संगीतकार तथा गायक कृष्णभक्त राई, गायिका जुनी खालिङ राई र स्थानिय कलाकारहरुको बेजोड प्रस्तुति रहेको थियो ।
