धनकुटामा लोप हुंदै लिङ्गे र रोटे पिङ
धनकुटा,१० कार्तिक । धनकुटाको छथर जोरपाटी गाउँपालिकाका कर्ण बहादुर लिम्बुले केही बर्ष यता तिहारमा पिङ हाल्नका लागि लठारो बाट्नु परेको छैन् ।
त्यस्तै धनकुटा नगरपालिकाका राम बहादुर राईले पनि पिङ हाल्नकै लागी बाबियो काट्न जंगल जानु परेको छैन् । दसैं र तिहार भन्नेबित्तिकै सबैलाई पिङको सम्झना आउँछ तर पछिल्लो समय गाउँदेखि सहरसम्म पिङमा रमाउने मौलिक परम्परा हराउन थालेको छ ।
हरेक जसो तिहारमा यो समय पिङ बाट्ने र हाल्ने गाउँघरमा टोलै पिच्छे जस्तो हतारो र प्रतिष्पर्धा नै हुने गरेको थियो तर अहिले गाउँघरमा पिङ हाल्ने र खेल्ने परम्परा हराउँदै गएको छ त्यसैले गाउँका युवा भेला भएर पिङका लागि लठारो बाट्नु नपरेको कर्ण बहादुर लिम्बु सुनाउँछन् । लिम्बु भन्छन् बिशेष दशैमा भन्दा पनि तिहारमा पिङ हाल्ने र खेल्ने चलन गाउँमा घरमा धेरै थियो तर पछिल्लो समय यो परम्परा हराउँदै गएको छ ।
दशैँको लागे संगै टोल टोलमा रोटे र लिङ्गे पिङ तिहारसम्मै राखिन्थ्यो तर अहिले कही कही मात्र लिङ्गे पिङ देख्न सकिन्छ रोटे पिङ त लोप नै हुन लागेको धनकुटा नगरपालिका लोकेन्द्र लिम्बु बताउँछन् । घर घरमा टेलिभिजन हातहातमा मोवाइल जस्ता मनोरञ्जनका अन्य साधनहरू प्रशस्तै आएकाले पनि यस्ता पिङतर्फ आकर्षण घटेको लिम्बु बताउँछन् ।
