धनकुटाको मधुगंगा महादेवस्थानमा धान्य पुर्णिमा तथा उधौली पर्वको अवसरमा लाग्ने धार्मिक मेला सुरु(भिडियो सहित)
धनकुटा । धार्मिक तथा पर्यटकीय स्थल मधुगंगा महादेवस्थानमा धान्य पुर्णिमा तथा उधौली पर्वको अवसरमा लाग्ने धार्मिक मेला सुरु भएको छ ।
धनकुटा नगरपालिका वडा नम्बर दुइमा रहेको यो धार्मिक स्थलमा मेला भर्न, भाकल छिन्न तथा मधुगंगा महादेवको दर्शको लागि बिभिन्न जिल्लावाट हजारौ भक्तजन आएका छन् । शनिवारवाट सुरु भएको मेला पुर्णिमाको भोलीपल्ट अर्थात सोमवार सम्म सञ्चालन हुने छ ।
मधुगंगा धामको झरनामा नुहाउने र गुफाभित्र शिवलि रहेको महादेवथानमा पूजा गर्ने गरिएको छ । यो मन्दिर मधुखोलाको ६० फिट अग्लो झरना सँगै रहेको करीब ६० फीट लामो प्राकृतिक गुफा भित्र अवस्थित छ र गुफाको अन्तमा शिवलिङ्गको आकृती रहेको छ ।
शिवलिङ्गलाई महादेवको प्रतिक मानी पूजा गर्ने तथा आफले चाहेको वर माग्ने गरिन्छ । त्यस्तै यसैको छेउमा लिङ्गेश्वरी देवीको स्थापना गरीएको छ । मेला लागेको बेला मन्दिरमा भाकल पूरा गर्ने र त्यसो गरेमा मनोकामना पूरा हुने विश्वास रहेको मन्दिरका पुजारी जमानध्वज राईले बताउनु भयो ।
मधुगंगा मन्दिर धनकुटा सदरमुकामबाट करिब १० किलोमिटर पूर्व तर्फ रहेको यो स्थान धनकुटा बजार तथा हिले हुदै यो स्थानमा पुग्न सकिन्छ । मेला भर्न धनकुटा, तेह्रथुम, भोजपुर, संखुवासभा, सुनसरी, मोरङ, झापा, सिराहा, सप्तरी लगायत पूर्वका अधिकांश जिल्लाबाट भक्तजनहरु आउने गरेको धनकुटा नगरपालिका वडा नम्बर दुईका वडाध्यक्ष चन्द्रलाल तामाङ्ले जानकारी दिनुभयो ।
तिन दिनमा तिस हजार भन्दा बढि दर्शनार्थीले मन्दिरको दर्शन गर्ने तथा मेला भर्ने जनाइएको छ ।
