नेपाल पत्रकार महासङ्घ धनकुटा शाखाले आफ्नो वेबसाइट निर्माण गर्ने
धनकुटा,१६ माघ । नेपाल पत्रकार महासङ्घ धनकुटा शाखाले आफ्नै वेबसाइट निर्माण गर्ने भएको छ।
आज बसेको जिल्ला कार्यसमिती धनकुटाको बैठकले वेबसाइट निर्माण गर्ने निर्णय गरेको नेपाल पत्रकार महासंघ धनकुटाशाखाका अध्यक्ष विदुर खवासले बताउनु भयो ।
महासङ्घको स्थापना कालदेखि हालसम्मका महत्वपूर्ण कागजातहरू डिजिटल प्रणालीमा सुरक्षित राख्न वेबसाइट उपयोगी हुने भएकाले वेबसाइट निर्माण गर्न लागिएको नेपाल पत्रकार महासङ्घ धनकुटा शाखाका अध्यक्ष खवासको भनाइए थियो ।
पत्रकार महासङ्घलाई प्रविधिसँग अघि बढाउन तथा सूचना प्रवाहलाई व्यवस्थित गर्न वेबसाइट निर्माण हाम्रो प्राथमिकतामा रहेको सचिव हरिबहादुर लम्जेलले जानकारी दिए । महासङ्घले छिट्टै नै वेबसाइट निर्माण प्रक्रिया अघि बढाउने तयारी गरिरहेको छ। वेबसाइट निर्माणपछि महासङ्घका गतिविधिहरू अझ व्यवस्थित, पारदर्शी र प्रभावकारी हुने अपेक्षा गरिएको छ।
त्यस्तै महासंघले सञ्चालनमा ल्याएको पुस्ककालयाई व्यवस्थित गर्ने, महासंघको गतिविधिलाई समेटेर भित्ते पात्रो प्रकाशन गर्ने,स्थानीय तहका प्रमुख उपप्रमुख, प्रमुख प्रशासकीय अधिकृत तथा अग्रज पत्रकारहरुसग विभिन्न विषयमा अन्तरक्रिया गर्ने तथा सञ्चार डायरी प्रकाशन गर्ने लगायतका निर्णय गरिएको महासंघले जनाएको छ ।
